Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Actualitads

Angelika Kauffmann. Nov en la collecziun
12-03 - 31-12-2022​

A chaschun d'ina generusa donaziun d'ovras impurtantas dad Angelika Kauffmann deditgescha il Museum d'art dal Grischun a questa artista ina preschentaziun da la collecziun amplifitgada.

Angelika Kauffmann (1741–1807) è stada l'artista europeica la pli impurtanta da ses temp e vegn stimada oz zunt fitg sco pictura excellenta dal temp tranter il classicissem e la romantica. Ella è naschida a Cuira, ha lavurà cunzunt en l'Italia ed en l'Engalterra ed è morta a Roma. Ella è represchentada en las collecziuns las pli impurtantas da gronds museums. En il Museum d'art dal Grischun stattan sias ovras gia daditg en moda fulminanta al cumenzament da la collecziun: L'autopurtret (Selbstbildnis) superbi, en il qual Angelika Kauffmann sa mussa sco artista conscienta da sasezza, è in da ses maletgs ils pli enconuschents. Las Trais chantaduras (Drei Sängerinnen) dattan perditga tant da l'affinitad per la musica, ch'ella ha gì durant sia entira vita, sco er da sia abilitad da reproducir cuntegns cumplexs cun meds figurativs differenziads. E Telemachos sin l'isla da la Calipso (Der trauernde Telemach) mussa en moda evidenta che Angelika Kauffmann prenda bleras da sias materias ord la litteratura e ch'ella exprima uschia fins muments psicologics.

Grazia ad ina donaziun po quest accent impurtant da la collecziun dal Museum d'art dal Grischun ussa vegnir amplifitgà ulteriuramain. Sur plirs decennis ha il donatur generus, dr. Johannes Fulda da Maiavilla e da Kilchberg, cumpilà in'excellenta gruppa d'ovras ch'el surdat al Museum d'art dal Grischun e renda uschia accessibla a la publicitad. Da questa gruppa d'ovras fan part ina segunda versiun da Telemachos sin l'isla da la Calipso (ina terza versiun sa chatta en il Metropolitan Museum a New York), dentant er pèrs da maletgs d'ina qualitad speziala e realisads en moda premurusa cun la Penelope en malencurada (Penelope trauert über dem Bogen des Odysseus) u cun persunificaziuns da la bellezza. Figuras ch'èn contristadas pervia da l'amur, tutgan tar ils motivs ils pli appreziads dad Angelika Kauffmann. En preschentaziuns simbolicas ha ella chattà ina iconografia che dat la tempra a la pictura d'ina entira epoca.

Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00