Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Actualitads

venedigsche sterne
art e surcusidas
27-08 - 20-11-2022​

Las surcusidas e cunzunt il pitg da crusch han ina lunga tradiziun en il Grischun. La ritga collecziun da surcusidas dal Museum retic permetta da contemplar las surcusidas localas en in context pli vast. Ord la perspectiva da l'art contemporan vegn a medem temp accentuada l'actualitad da questa pratica artistica.

L'exposiziun mussa surcusidas dal Grischun e confrunta las ovras cun talas dad artistas ed artists internaziunals. I sa mussa uschia che la tradiziun artisanala dal Grischun è vegnida nutrida da differentas culturas gia dal cumenzament ennà. Las surcusidas tradiziunalas sveglian dumondas che vegnan ozendi tschentadas da nov en vista ad autras experientschas socialas e culturalas. Il cumenzament dal 20avel tschientaner è questa lavur a maun feminina vegnida revalurisada e promovida cleramain. Il medem mument han artistas ed artists sco Sophie Taeuber-Arp, Alice Bailly ed Ernst Ludwig Kirchner gidà considerablamain a conceder tras il spiert da l'artisanadi novs impuls a l'art da l'avantgarda. Blers onns pli tard prendan artistas ed artists puspè la guglia enta maun e surcusan, sco Alighiero Boetti u Susan Hefuna, e fan cun lur ovras punts sur cunfins e sur spazis culturals ora. L'art contemporan cun surcusidas vul metter en dumonda ed avrir l'estetica tradiziunala. Uschia utilisescha Louise Bourgeois tocs da vestgadira per sias ovras ed als renda purtaders da situaziuns emoziunalas e psicologicas. Eliza Bennet, che surcusa l'agen maun, u Véronique Arnold, che purtretescha surcusidras, fan attent a las cundiziuns da lavur en l'industria ed en il tegnairchasa. Elaine Reicheck percunter analisescha, co ch'il fil sco med d'autoritad feminina sa preschenta en la mitologia antica e co che questa istorgia vegn pli madira en la pictura europeica. E Gözde Ilkin illustrescha sin lenziels e sin surtratgas da letg figuras che giran per il mund e sviluppa uschia maletgs impressiunants davart la tschertga dal dachasa. Uschia dattan artistas ed artists contemporans ina nova forza al fil ed a la guglia, per imaginar poeticamain ed il medem mument er sociocriticamain il mund dad oz.

L'exposiziun curatada da Stephan Kunz e da Susann Wintsch mussa ultra da surcusidas tradiziunalas dal Grischun er ovras da Véronique Arnold (F), Latifa Attaii (AFG), Alice Bailly (CH), Eliza Bennett (GB), Alighiero Boetti (I), Louise Bourgeois (F/USA), Rehab Eldalil (EGY), Susan Hefuna (D/EGY), Gözde İlkin (TR), Ernst Ludwig Kirchner (D), Isa Melsheimer (D), Marisa Merz (I), Irene Posch (A), Elaine Reichek (USA), Jean-Frédéric Schnyder (CH), Rozita Sharafjahan (IR), Annegret Soltau (D), Sophie Taeuber-Arp (CH), wiedemann/mettler (CH), Jeanne Natalie Wintsch (POL/CH).
 
Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00