Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Prevista

​Ilse Weber. Clera notg
18-02 – 30-07-2023

Ilse Weber (1908-1984) è ina persunalitad excepziunala ed ina figura singula en l'istorgia d'art da la Svizra. Ella appartegna a quella generaziun d'artistas (Ilse Weber è da la medema generaziun sco Meret Oppenheim), che n'ha anc betg gì la chaschun da far ina scolaziun ed ina carriera tipica. Suenter ils emprims pass plitgunsch precauts en il mund da lavur è suandada relativamain tard la renconuschientscha uffiziala. Ses origin ha l'artista en in impressiunissem tardiv plitost serius. Pli e pli ha ella dentant empruvà da registrar ideas e regurdientschas e d'exprimer «quai ch'ella n'ha anc mai vis». L'onn 1970, cura ch'ina nova generaziun d'artistas ed artists è sa preschentada a la publicitad, è Ilse Weber arrivada andetgamain en il center dals discurs artistics actuals. Quai ha stimulà la lavur dad Ilse Weber. Naschida è ina ovra tardiva particulara (l'artista aveva quella giada gia passa 50 onns): sia ovra principala per propi, en la quala ella è sa deditgada ad ina subjectivitad poetica. Ultra da la pictura en ieli èn daventads impurtants er il dissegn e l'aquarel. Il mund sin ses maletgs era en ina ballantscha tranter in tema convenziunal – natira morta, cuntrada, interiur – ed ina realitad fictiva.

L'ultima exposiziun individuala dad Ilse Weber ha gì lieu l'onn 1992 en la Chasa d'art a Turitg. L'exposiziun en il Museum d'art dal Grischun è pir la segunda gronda exposiziun da l'artista en in museum d'art, cumbain che Ilse Weber è represchentada en bleras collecziuns publicas e privatas e cumbain ch'ella vegn anc adina stimada fitg, en spezial da las artistas e dals artists.

L'exposiziun en il Museum d'art dal Grischun ha la finamira da dar ina survista represchentativa davart las ovras dad Ilse Weber, davent da ses success artistic l'onn 1960 fin a sia mort l'onn 1984. En otg chapitels vegni empruvà – tant en l'exposiziun sco er en il cudesch accumpagnant – da porscher ina nova interpretaziun da questa ovra. Ultra da texts da Stephan Kunz, dad Elisabeth Bronfen e da Romina Ebenhöch mussa in discurs cun l'artista Silvia Bächli e cun l'artist Rolf Winnewisser la gronda relevanza dad Ilse Weber per l'art pli nov da la Svizra.


Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00