L’onn 1900 ha l’uniun grischuna d’art cumenzà a far ina collecziun d’art. Oz èsi l’incumbensa da la fundaziun Collecziun grischuna d’art d’acquistar sistematicamain ovras per il Museum d’art dal Grischun a Cuira, e quai per augmentar en moda raschunaivla ils effectivs. La collecziun cumpiglia en il fratemp circa 8000 lavurs da tut ils geners da l’art figurativ e s’extenda da la perioda a partir dal 18avel tschientaner fin al di d’oz. Dapi sia fundaziun è la collecziun dal Museum d’art dal Grischun sa sviluppada or da la situaziun culturala specifica dal Grischun: Latiers tutgan l’influenza da la cuntrada alpina sco er la confruntaziun da l’emigraziun cun il turissem. Artistas ed artists vegnan e van, portan las particularitads or en il mund e turnan cun il mund enavos en il Grischun. L’istorgia da l’art en il Grischun è caracterisada da differentas figuras e da moviments da gronda influenza, dals quals èn resultads accents spezials en la collecziun. Il sectur da l’art contemporan reflectescha en la collecziun dentant er la diversitad da la lavur artistica contemporana.
L’engrondiment dal Museum d’art dal Grischun permetta da mussar permanentamain parts represchentativas da la collecziun. Per tegnair activa la vista vegni empruvà da far constellaziuns alternantas en la collecziun. Quai permetta da metter en il focus tschertas ovras singulas, da preschentar gruppas d’ovras pli grondas en lur connex u da stgaffir contexts tematics. En la Villa Planta ed en l’edifizi d’engrondiment poi vegnir experimentà cun l’art en moda e maniera differenta. Parallelamain a la preschentaziun da la collecziun mussa il Museum d’art dal Grischun Cuira regularmain exposiziuns temporaras. Cun il program d’exposiziun vegn il profil dal museum d’art sviluppà vinavant. Ultra da preschentaziuns d’artistas e d’artists historics e contemporans han adina puspè er lieu exposiziuns en gruppas tematicas. La collecziun ed ils conturns artistics, culturals e geografics dal museum d’art èn puncts da referiment impurtants per las exposiziuns temporaras.
