L’artist svizzer Peter Trachsel (1949-2013) è vegnì enconuschent sin nivel internaziunal cun ses projects socioculturals, realisads cun l’uniun Hasena en il vitg da Küblis (Partenz). Suenter sia furmaziun sco decoratur ha el frequentà la scola per design experimental F+F a Turitg da 1972 a 1973. El è stà in dals piuniers da la performance en Svizra ed ha retschavì persuenter numerus premis. A partir da 1981 ha el gestiunà l’uniun Hasena – l’institut per in stgomi d’art fluid, ch’è daventà il center da sias activitads artisticas. Pli tard ha el cumenzà ad iniziar projects participativs. La plipart da quests projects èn vegnids creads en collavuraziun cun auters artists e savens er cun includer la lavur da laics. En la mesadad dals onns 1980 sa renda el cun sia famiglia da Turitg a Dalvazza sper Küblis en il Partenz (GR) nua ch’il milieu rural daventa ses nov champ d’acziun. Il center cultural Passagenhaus è stà inaugurà a Küblis 2005 e sco purtader da quest center cultural è vegnida fundada la Fundaziun per in stgomi d’art fluid. Sper questas activitads organisatoricas e schurnalisticas, ha Peter Trachsel adina producì ovras d’art en in senn plitost tradiziunal. Quellas cumpiglian dissegns, sculpturas, fotografias e projects d’art en l’edifizi. L’exposiziun en il labor dal Museum d’art dal Grischun dat invista en la lavur polivalenta da Peter Trachsel e vul a medem temp esser ina tribuna per ina seria d’occurrenzas.