Flurin Bisig (*1982) viva e lavura actualmain a Glaruna. Suenter ses studi a la scola auta d’art da Lucerna ed a l’universitad dals arts a Berlin ha el vivì per pli ditg a Brüssel. Bisig n’è fin ussa quasi betg enconuschent sco artist en Svizra. Sia participaziun a l’exposiziun annuala a Lucerna ha però gì per consequenza ch’el è sa participà al Swiss Art Award. Il museum d’art dal Grischun dat a l’artist l’occasiun da mussar sias ovras sculpturalas autonomas ad in public pli grond.

Per il museum d’art dal Grischun vegn Flurin Bisig a crear ina nova gruppa d’ovras. Las sculpturas che vegnan stgaffidas aposta per l’exposiziun vegnan fatgas or da tola ondulada. Ellas confruntescha Flurin Bisig cun ina sculptura da marmel. La lavur cun marmel è in vegl giavisch da Bisig. Ils divers materials premettan modas e manieras da lavurar ch’èn differentas ed uschiain auter tractament da la sculptura e dal spazi. Questa tensiun è il punct da partenza da l’exposiziun.

Bisig lavura en moda abstracta ed intercurescha co che furmas sa sviluppan ed influenzeschan sco sculpturas nossa percepziun e noss sentiment per il spazi. El s’orientescha als constructivists, integrescha però er bleras influenzas da l’art dal temp modern e da l’architectura. Sper la lavur sculpturala ha Flurin Bisig sviluppà durant blers onns in cumplex d’ovras da lavurs da palpiri da colur ch’el numna faudaziuns. Las serias che tiran endament dissegns e ch’èn per gronda part enramadas, èn in transferiment dal pensar sculptural en ina furma bidimensiunala. En il museum d’art dal Grischun mussa Flurin Bisig tuttas duas parts ensemen en ina preschentaziun che sa referescha al local d’exposiziun.