In'exposiziun en memoria dad Eberhard W. Kornfeld (1923–2023)
Il Museum d'art dal Grischun deditgescha ad Alberto Giacometti in'exposiziun che sa basa dal tuttafatg sin ses onns temprivs e sin ses svilup artistic. L'exposiziun vul mussar, a tge che l'artist giuven s'orientava durant ses svilup, quant stretg ch'el collavurava cun ses bab Giovanni Giacometti e co ch'el è plaunet sa distatgà da quel, ma er co ch'el dissegnava e malegiava ses ambient persunal: en la famiglia, a Stampa sco er durant ses temp da scola a Schiers ed a Genevra. Betg sco ultim cumenza durant quest temp er ina confruntaziun intensiva cun ovras da l'istorgia d'art. Alberto Giacometti daventa conscient da sia rolla sco artist. En autopurtrets impressiunants visualisescha el quai gia a partir da l'onn 1916, cura ch'el ha 15 onns. Quai mussan er ils purtrets che Giovanni Giacometti ha picturà dal giuven artist. Gia durant ses giuvens onns creescha Alberto Giacometti las emprimas sculpturas ch'al mussan la via ch'el vegn a prender. L'exposiziun cumenza cun las ovras dal giuvenil da 12 onns e s'extenda fin a ses emprims onns a Paris, cura che Alberto Giacometti è s'occupà dal mund visual cubistic ed ha realisà emprimas exposiziuns.
Fin ussa è sia ovra tempriva bain adina vegnida contemplada en connex cun il svilup posteriur dad Alberto Giacometti e ses talent giuvenil vegniva accentuà. En questa exposiziun qua stat sia ovra tempriva per l'emprima giada cumplettamain en il focus ed ella vegn dilucidada en sia dimensiun surprendenta ed en sias differentas fassettas.
L'exposiziun vegn curada da Stephan Kunz e Paul Müller. Ella è vegnida sviluppada en stretga collavuraziun cun la Chasa d'art da Turitg e cun la fundaziun Giacometti. Tar l'exposiziun cumpara in catalog cumplessiv cun texts da Philippe Büttner, Casimiro di Crescenzo, Christian Klemm, Stephan Kunz e Paul Müller.
Foto: Alberto Giacometti vor dem Haus von Antonio und Evelina Giacometti in Rom, Juni 2021, Archiv: Familie Berthoud
