L'exposiziun tematisescha l'istorgia dal maletg da natira morta da Max Slevogt e quella da ses anteriur possessur Hugo Simon (1880–1950), in banchier gidieu ed anteriur minister da finanzas da la Prussia dals socialdemocrats independents da Berlin, in ami e collectader d'art enconuschent ch'è er stà model per il roman «November 1918» dad Alfred Döblin. Suenter che Adolf Hitler era vegnì nominà sco chancelier da l'imperi ils 30 da schaner 1933 è Simon stà periclità gist en plirs reguards – ina giada per motivs rassistics, e da l'autra vart per motivs politics. El è emigrà en Frantscha. Il zercladur dal 1940 han el e sia dunna pudì fugir a Marseille che n'era betg occupà, e la finala è gartegiada il 1941 la fugia sur la Spagna ed il Portugal en la Brasilia.

Rita Janett (1893–1965) e Hugo Simon tgiravan dapi lur temp cuminaivel a Paris ina stretga amicizia. Janett era in'artista grischuna ch'era activa ils onns 1920 en ils conturns da la gruppa d'artists tessinaisa «Der grosse Bär». Ella ha gidà e sustegnì il pèr Simon sin sia fugia. L'amicizia da Rita Janett e da Hugo Simon, che ha superà la fugia, la persecuziun e l'exil sco er intschertezzas finanzialas e la separaziun locala, vegn reflectada per l'emprima giada en l'exposiziun.