Per las iconas da la moderna vegnan pajadas summas da record, artistas giuvnas ed artists giuvens gudognan entaifer pauc temp fitg blers daners, entant che artistas ed artists ch'eran ina giada renumads van en emblidanza e svaneschan en ils deposits da las collecziuns publicas ch'èn pli che fullanads. Là restan lur ovras zuppadas. Senza tangar la polemica davart l'art ed ils daners vuless l'exposiziun «Davart la valur da l'art» sclerir – a maun da tschertas posiziuns da la collecziun dal Museum d'art dal Grischun – la relaziun cumplexa tranter l'art e la valur. Ovras da Dieter Roth, dad Ingeborg Lüscher, dad Urs Lüthi, da Fischli/Weiss u da Ben Vautier vegnan messas en relaziun cun ils temas che permettan d'ans avischinar al misteri da la valur. La caducitad, la dumonda davart l'autur, l'ironia u la suveranitad d'interpretar èn mo intgins aspects en quest connex. Tge ans raquinta ina lavur da Dieter Roth, che consista da victualias che van plaunsieu a mal, davart l'impurtanza da la consistenza materiala? Tge invistas ans dat la mistificaziun dad Urs Lüthi davart la rolla da l'autur? Tge ans di l'ironia tar Fischli/Weiss davart l'appropriaziun artistica? Tge enconuschientschas emprendain nus davart ils cunfins dal context artistic, sche nus vesain la pagina concepida da Ben Vautier en la gasetta naziunala? Ozendi vegni spetgà adina pli savens, che betg mo las acturas ed ils acturs dal manaschi d'art giuditgeschian davart l'impurtanza da l'art. Da nov vul er la publicitad vegnir integrada en quests process. L'exposiziun duai svegliar questa discussiun ed a medem temp stgaffir in spazi per interpretaziuns persunalas.
Cun Notta Caflisch, Franz Eggenschwiler, Fischli/Weiss, Karl Gerstner, Diego Giacometti, Camille Graeser, Lise Gujer, Alfonso Hüppi, Pierre Keller, Ernst Ludwig Kirchner, Verena Loewensberg, Ingeborg Lüscher, Urs Lüthi, Guido Nussbaum, Meret Oppenheim, Ulrike Rosenbach, Dieter Roth, Jean-Frédéric Schnyder, Gaudenz Signorell, Daniel Spoerri, André Thomkins, Ben Vautier, Not Vital, Andreas Walser, Lydia Wilhelm, Marcel Wyss.
