L’onn 1878, a chaschun d’exchavaziuns a la Mosel, è vegnida scuvrida ina gronda sculptura da crap che represchenta ina bartga da vin romana. In model da questa sculptura serva a Jan Kiefer ( Trier, D, 1979 ), che viva e lavura a Basilea, sco basa per ina nova seria da maletgs. L’emprim maletg da la gruppa d’ovras mussa il piz da la bartga da vin romana, l’ultim la cua. Jan Kiefer creescha ina successiun da sequenzas che sa referescha a la logica d’in cudesch furmicler u d’in cudesch da maletgs e che fa or da la bartga ina tribuna, sin la quala Romans gesticulants discutan animadamain davart il senn e l’intent da la cultura umana. Sco bain cultural è il vin in simbol multifar en la religiun ed en l’art ed è in motiv che sa repeta en la lavur da l’artist. Cun furbaria e cun luciditad na dumonda Jan Kiefer betg mo la significaziun culturala da l’art en nossa societad, mabain confrunta – cun la figura dad Obelix en vaider antic – ils Romans cun in simbol da l’opposiziun, e reflectescha co che er epocas marcantas èn passageras, influenzeschan dentant tuttina nossa vista dal mund actuala.