Otto Dix (1891–1969) vala sco in dals pli impurtants artists tudestgs dal 20avel tschientaner. Ils onns 1920 è el vegnì enconuschent pervia da ses realissem engaschà. Durant il temp dal naziunalsocialissem è el però gist pervia da quai daventà in artist proscrit. L'onn 1933 ha el pers sia professura a l'Academia d'art da Dresden. Sias ovras valevan quella giada sco «art degenerà». Otto Dix è sa retratg e sa chasà en vischinanza dal cunfin svizzer al Lai da Constanza. Là ha el creà dal 1933 fin il 1945 principalmain maletgs da cuntradas. Quests maletgs reflecteschan en moda surprendenta l'ignoranza e las cuntradicziuns dal temp. Sin ses maletgs da cuntradas dat en egl sia moda da dissegnar da maister vegl. Quella stat en in ferm cuntrast cun l'ovra expressiunistica. Sias cuntradas valan sco maletgs d'ina «emigraziun interna» ed intermedieschan cun lur praticamain terribla vanadad in malesser dal temp.

Per las ovras malegiadas e dissegnadas dad Otto Dix è la Svizra durant ils onns 1930 in punct da referenza impurtant. Sias relaziuns artisticas e biograficas cun la Svizra èn dentant vegnidas resguardadas fin ussa mo darar. En in'exposiziun specifica sco er en ina publicaziun detagliada sa deditgescha il Museum d'art dal Grischun a questas relaziuns. En il center da l'exposiziun stattan las ovras dad Otto Dix ch'el ha creà la fin dals onns 1930, cura che l'artist ha passentà in temp pli lung en l'Engiadina per far ina cura. Questas ovras n'èn fin ussa anc mai vegnidas mussadas ensemen. Il maletg San Gian im Winter da la collecziun dal Museum d'art dal Grischun po uschia vegnir mussà per l'emprima giada en in context pli grond cun ulteriurs maletgs d'ieli e cun ina retscha da dissegns fitg exacts.
L'exposiziun vegn curada da Stephan Kunz e Prof. Dr. Ina Jessen.