Il Museum d'art dal Grischun celebrescha ses giubileum: Avant 125 onns è vegnida fundada l'Uniun grischuna d'art ch’è stada la basa da nossa instituziun. Il program da giubileum terminescha cun l'exposiziun annuala da las artistas e dals artists grischuns davart il tema «à table».
Per quest motiv deditgescha il Museum d'art dal Grischun in'exposiziun commemorativa a Daniel Spoerri, sco il pionier da l'eat art, ch'è s'occupà durant sia entira vita cun tut las furmas da la culinarica e dal past festiv. Senza el na fissan bleras chaussas en quest context betg daventadas pussaivlas en l'art. Cun sia mort avant in onn ha il mund da l'art pers in artist ed intermediatur impurtant. Daniel Spoerri è stà l'onn 1960 commember fundatur da la gruppa nouveaux réalistes, da la quala fan part tranter auter Yves Klein, Arman, César, Tinguely e Niki de Saint-Phalle. Il medem onn ha el creà ses emprims «maletgs da trapla», als quals Spoerri engrazia ses renum internaziunal. Cun l'avertura dal restaurant da la Galerie J a Paris è sa manifestà per l'emprima giada ses interess profund per l'art culinaric. L'onn 1968 ha el avert a Düsseldorf il Restaurant Spoerri, che daventa il lieu d'inscunter da la scena d'art internaziunala. Sur il restaurant ha l'artist endrizzà l'onn 1970 ina gallaria d'eat art. L'exposiziun reunescha ovras represchentativas da Daniel Spoerri sco er films e numerus documents che manifesteschan ses interess artistic specific.