Fadri Cadonau (*1996) è vegnì undrà cun il premi d'art da l'Uniun grischuna d'art 2025. En l'exposiziun individuala appartegnenta en il Museum d'art dal Grischun maina l'artist las visitadras ed ils visitaders sin in viadi d'experientscha.

Fadri Cadonau viva e lavura a Glion. Sias lavurs mussan – ultra da lur qualitads formalas – adina er puncts centrals tematics che reflecteschan davart temas da la societad. En l'exposiziun annuala 2024 ha el perscrutà il sistem filigran da la citad gronda ed ha persvadì uschia la giuria dal premi d'art: Ina chasa, construida cun meds fitg simpels, dat suttetg ad ina lavur da video. En il video vesan ins l'artist che construescha – amez ina cruschada a Buenos Aires – ina chasa or da barricadas cotschnas-alvas da plazzals. La construcziun temporara è daventada in pitschen refugi amez la vita pulsanta da la metropola, nua ch'il spazi da viver è in bain rar. A medem temp è ella daventada in impediment per il traffic intensiv – in impediment che ha stuì vegnir acceptà e guntgì sco part da las premissas architectonicas.

L'exposiziun actuala en il labor dal Museum d'art dal Grischun è ina inscenaziun spaziala transibla, che cumenza cun in presentiment sonor e che sbucca en ina installaziun sculpturala. L'experientscha visuala e l'experientscha auditiva entran en in dialog vicendaivel, en il qual la percepziun, la realitad mediala e sia inscenaziun sa maschaidan ina cun l'autra. Uschia reprenda Cadonau discussiuns actualas davart la dumonda, quant enavant che differentas percepziuns caracteriseschan debattas socialas da noss temp: Co naschan nossas ideas da la vardad? Cun tge meds po nossa idea da la vardad schizunt vegnir dirigida? Nua èn ils motivs per questas discrepanzas?

Cun il premi d'art da l'Uniun grischuna d'art vegn undrada l'ovra da Fadri Cadonau – in'ovra engaschada sco er poetica, che sa mussa d'ina vart sco fitg averta, ma ch'è tuttina adina formulada fitg exactamain.