L'artista giapunaisa-svizra Leiko Ikemura (*1951) tutga tar las pli impurtantas artistas dal temp preschent. En ses maletgs ed en sias sculpturas perscrutescha ella ils passadis tranter uman e natira. Leiko Ikemura è creschida si a la costa dal Giapun ed è vegnida l'onn 1972 en l'Europa. Suenter segiurns en Spagna ha ella transferì l'onn 1979 ses center da vita en Svizra. Pli tard ha ella vivì a Cologna ed a Berlin. L'onn 1989 è ella sa retratga per in onn en las muntognas grischunas per lavurar. Durant quest temp è ella s'orientada dal tuttafatg da nov. Motivada da las experientschas directas cun la natira è ella sa fatschentada en sia pictura cun l'uman e cun sias dumondas existenzialas en in cosmos che para infinit. Cun l'exposiziun en il Museum d'art dal Grischun returna Ikemura en quella regiun, nua che sia pictura aveva prendì pli baud in'autra direcziun. Cuntrasts – sco perdita e renovaziun, midada ed enragischaziun – cumbinescha ella en l'exposiziun danovamain ad in'unitad. En la cumbinaziun da pictura, sculptura e projecziun da films lascha ella nascher in spazi, en il qual la mar è situada sur las muntognas ed il temp sa schlia.