Noemi Pfister (*1991) è la victura dal Premi d'art Manor 2025 Grischun. Per quest motiv realisescha ella sia pli gronda exposiziun individuala fin ussa. Sin ils novs maletgs, che l'artista grischuna creescha per l'exposiziun en il Museum d'art dal Grischun, collia ella motivs da l'istorgia d'art sco er da la cultura populara. Temas sco giuventetgna, digitalitad, ecologia e corp cumbinescha el simbolicamain a narraziuns cumplexas. En sias cuntradas sumegliantas a siemis sa trategnan figuras misteriusas che paran da derivar d'in mund parallel. Lur corps paran d'avair defurmaziuns anatomicas. Ellas fan ina pausa sin ina terrassa e guardan en per il sulegl, ellas fan exercizis da gimnastica, ch'èn dapli in gieu ch'in trenament, u baivan energydrinks, per sa dustar cunter la stancladad. Ils munds visuals regordan mintgatant a la cumposiziun d'ovras dals vegls maisters – la vestgadira da las figuras, las posiziuns da lur corps u ils objects reflecteschan dentant la giuventetgna da noss preschent. En la cumbinaziun tranter l'enconuschent ed il smanatschant exploreschan ils maletgs, en tge furmas da cuminanzas che nus vegnin forsa a viver en il futur.