Ina pausa da mezdi tut speziala As porscha il museum d'art dal Grischun. En 30 minutas scuvris Vus – grazia a la savida fundada da nossa intermediatura u da noss intermediatur d'art – ina tscherta ovra da la collecziun u d'ina exposiziun. Suenter l'inspiraziun artistica chattais Vus il daletg culinaric en noss café da museum cultivà, avant che Vus As deditgais inspirada u inspirà puspè al mintgadi.

Regularmain, mintgamai da las 12.30 fin las 13.00

Annunzia: necessaria
Lingua: tudestg
Durada: 30 minutas
Custs: inclus en il pretsch d'entrada

 

Il museum d'art dal Grischun a Cuira è in museum d'inscunters e d'experientschas. La gronda part da las occurrenzas furma ina part integrala da las exposiziuns, figurescha però natiralmain sco occurrenzas spezialas en nossa agenda.

Il museum sa chapescha er sco forum, nua ch'i vegnan discutadas tant dumondas da l'istorgia d'art sco er dumondas socialas, artisticas, filosoficas, quotidianas, istoricas, scientificas, creativas u spontanas. Nus iniziain talas occasiuns e moderain quellas, Vus prendais posiziun, dais impuls, instruis, emprendais, dirigis u giudais silenziusamain las occurrenzas. 

Tranter la purschida multifara d'excursiuns, da dietas specificas, da simposis e.u.v. chattais Vus segiramain il format che As correspunda.

Custs: Las occurrenzas spezialas n'èn betg tuttas gratuitas.

Il Museum d'art dal Grischun envida a l'Atelier da dumengia. Experimentai e creai suletta u sulet en famiglia u en il team. Las exposiziuns actualas u in tema captivant dattan ideas per l'avantmezdi creativ.
Faschai in viadi fascinant cun l'intermediatura d'art Sarah Clavadetscher tras il mund da l'art. Grazia a sia atgna lavur pratica artistica sa Sarah, tge ch'i dovra per ina buna creaziun.

La purschida sa drizza a tut las gruppas da vegliadetgna. Uffants pon participar en accumpagnament d'ina persuna creschida.

Dumengias 2024
19 da matg / 25 d'avust / 29 da settember / 27 d'october / 24 da november
mintgamai da las 10.30 fin las 12.30

Custs: Bigliet d'entrada per persunas creschidas. Per giuvenils fin 16 onns e per uffants gratuit.
Annunzia: betg necessaria

Infurmaziuns
kunstvermittlung@bkm.gr.ch 
T +41 81 257 28 72

Las vernissaschas da nossas exposiziuns èn publicas e nus ans legrain, sche Vus festivais ensemen cun nus las artistas ed ils artists, l'art ed ina saira plain inscunters. En noss chalender e sin las paginas da las exposiziuns chattais Vus las datas e las uras exactas.

Er nossa newsletter. As infurmescha regularmain.

Sco commembra u commember da l'uniun grischuna d'art survegnis Vus ultra d'auters avantatgs ina invitaziun persunala.

Il Museum d'art dal Grischun Cuira organisescha regularmain visitas guidadas tar las exposiziuns e preschentaziuns da las collecziuns. Durant in tur da 60 minutas emprendais Vus d'enconuscher l'exposiziun entira e tschertas ovras pli detagliadamain, e quai sut la direcziun cumpetenta da nossas intermediaturas e da noss intermediaturs d'art.

Custs: inclus en il pretsch d'entrada
Lingua: tudestg
Durada: 60 minutas
Annunzia: necessaria