Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2022

istorgias da piedestals
18-06 - 11-12-2022​

Ina preschentaziun da la collecziun davart il tema sculptura

En l'exposiziun «Istorgias da piedestals» tematisescha il Museum d'art dal Grischun la sculptura. L'exposiziun cun ovras da la collecziun documentescha, quant flexibla e quant vasta che la noziun «sculptura» è ozendi. Il gener da la sculptura sin in aut piedestal è passà. Cun la reducziun programmatica dal piedestal e cun l'integraziun da la contempladra e dal contemplader è la sculptura daventada democratica e sociala. L'exposiziun «Istorgias da piedestals» ch'è situada en il tract nov dal Museum d'art dal Grischun, mussa ovras ch'èn vegnidas creadas durant ils ultims var 80 onns e che mettan en evidenza quest svilup. Mintga local è deditgà ad in tema: diversitad, avdanza, epoca e sculptura-pictura.


L'exposiziun da la collecziun che cumpiglia 33 ovras da 28 artistas ed artists e d'in pèr d'artists, s'extenda tras quatter locals en il 1. plaun sutterran dal tract nov. En il local principal ch'è deditgà al tema «diversitad» cumenza l'exposiziun cun las chaschas da suflader da Mirko Baselgia, ch'èn a medem temp er il simbol per il titel da l'exposiziun. En l'ovra da Baselgia vegnan las istorgias apparentamain scutinadas a las visitadras ed als visitaders ord las chaschas furmadas sco piedestals. Plinavant vegnan mussadas qua ovras dad Evelina Cajacob, Martin Disler, Bethan Huws, Vaclav Pozarek, Jürg Stäuble u Not Vital cun ina plazza en il local e d'ina materialitad che na pudessan betg esser da pli gronda diversitad: lain, bronz, pail, terracotga, neon u aua. Schizunt il factur «temp» gioga ina rolla impurtanta en la sculptura da Roman Signer. E l'object en furma d'in utschè dad Erica Pedretti penda sur il palantschieu. Il segund local è deditgà a l'«avdanza». La chasa è in segn per il basegn da protecziun e da segirtad, saja quai sco alloschi simpel e modest sco la stalla da Gabriela Gerber e Lukas Bardill u sco lieu da cardientscha per sa retrair quietamain sco il pitschen tempel da Franz Eggenschwiler. Il crap erratic da Dominik Zehnder en la terza sala ch'è deditgada al tema «epoca», ans permetta da guardar enavos dal futur lontan sin l'antropocen, l'epoca da l'uman sin la Terra. Tge resta dal temp preschent? Tar Corsin Fontana, Daniel Spoerri e Dieter Roth èn ils process da transfurmaziun e da decumposiziun ina part da lur ovras che sa cumponan da materialias organicas. Sco la vita, uschia è Roth persvadì, duai esser er l'art, ed el duai sa transfurmar permanentamain, expost al ritmus dal temp. En il quart local ch'è deditgà a la «sculptura-pictura» dialogheschan dus maletgs dad Augusto Giacometti cun ina pictura platta e spaziusa dad Adrian Schiess. En l'ovra da Stefan Gritsch daventa la colur ina sculptura, ils cunfins tranter la pictura e la sculptura sa perdan, ed en l'ovra da Hugo Suter daventa l'assemblascha da materialias en la chascha che furma ina vitrina, la pictura d'in matg flurs. La finala lascha Pascale Wiedemann dialogar ses vestgids culads en rascha da poliester cun la tradiziun da malegiar autopurtrets, che datescha da tschientaners.

Ensemen cun: Mirko Baselgia, Flurin Bisig, Evelina Cajacob, Markus Casanova, Martin Disler, Franz Eggenschwiler, Corsin Fontana, Gabriela Gerber e Lukas Bardill, Stefan Gritsch, Hermann Hubacher, Bethan Huws, Leiko Ikemura, Sara Masüger, Erica Pedretti, Vaclav Pozarek, Dieter Roth, Christian Rothacher, Adrian Schiess, Roman Signer, Kurt Sigrist, Matias Spescha, Daniel Spoerri, Jürg Stäuble, Hugo Suter, Not Vital, Pascale Wiedemann e Dominik Zehnder.


Uras d'averturaMa-Du 10.00 – 17.00 Gi 10.00 – 20.00