Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2022

Grafica da l'Expressiunissem
18-06 - 31-12-2022​

"Scadin tutga tar nus, ch'exprima immediatamain e libramain quai ch'al timunescha da lavurar." – Programmaticamain cumenza l'expressiunissem cun in entagl en lain. L'onn 1906 stampa Ernst Ludwig Kirchner, sco in dals iniziants da la Brücke (1905), il program da la gruppa d'artists sco grafica. Las cundiziuns materialas e tecnicas da la grafica han permess a las artistas ed als artists da l'expressiunissem da chattar las premissas idealas per lur interess e per lur pretensiuns ad ina nova chapientscha dal art. Cun lingias expressivas e cun surfatschas reducidas ha la grafica marcà uschia la lavur artistica d'ina entira generaziun d'artistas ed artists.

Ultra d'admirar ils maletgs a format grond ed a colurs intensivas da l'expressiunissem, envida l'exposiziun a s'avischinar – en in dialog a pitschna distanza – a las litografias, a las gravuras ed als entagls en lain cun la forza expressiva da las ovras d'art impressiunantas d'artistas ed artists sco Ernst Ludwig Kirchner, Erich Heckel, Otto Mueller, Emil Nolde, Max Beckmann, Paula Modersohn-Becker, Käthe Kollwitz, Hermann Scherer, Albert Müller, Ignaz Epper, Fritz Paul u Werner Neuhaus.

Tematicamain cumpiglian las lavurs il spectrum da l'existenza umana tanter la vita en las grondas citads e l'idilla en la natira, mussan parcs e cafés, varieté e saut sco er cuntradas, accidents da viafier e scenas nocturnas. Preschentaziuns expressivas sin purtrets confrunteschan directamain las contempladras ed ils contempladers. Entant ch'en il motiv Dunnas che fan bogn sa reflectescha l'intimitad dal format, dattan munds muntagnards massivs perditga da l'influenza che la Svizra, sco lieu da referiment, ha gì en la cuntrada d'art.

La chaschun per la preschentaziun da la collecziun è l'exposiziun che avra parallelamain «Hermann Scherer. Crennas e chantuns» (18-06 – 25-09-2022).

Uras d'averturaMa-Du 10.00 – 17.00 Gi 10.00 – 20.00