Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2022

Hermann Scherer. crennas e chantuns
18-06 - 25-09-2022​

Hermann Scherer (1893–1927) è stà in dals represchentants ils pli impurtants da l'expressiunissem en Svizra. En sia lavur èn ils ultims 4 onns da sia vita il temp il pli marcant. Qua daventa «Scherer entagliader», cunquai ch'el – inspirà dad Ernst Ludwig Kirchner – va dal tuttafatg novas vias. L'exposiziun metta en il focus las ovras graficas da Scherer e mussa, co che la tecnica da l'entagl en lain rinforza sias stentas per chattar novas furmas e per obtegnair l'abstracziun da las figuras. Ina particularitad da l'exposiziun furman ils blocs da stampar da lain che vegnan exponids qua publicamain per l'emprima giada. Ils relievs sin la surfatscha plain crennas da las plattas ch'èn elavuradas per regla dad omaduas varts ans mettan materialmain davant egl ils culps vehements che Scherer ha fatg cun ils cuntels d'entagliar. Ils blocs da stampar vegnan mussads en proxima vischinanza dals fegls stampads, sin ils quals els èn vegnids bullads en fermezza varianta e differents palpiris.

Tematicamain concentrescha l'ovra d'entagls en lain da Scherer ils aspects centrals da sia entira lavur: L'isolaziun existenziala da l'uman en l'act ed en il purtret singul, las constellaziuns da pèrs (che na pon betg mitschar da questa isolaziun), maletgs da cuntradas en l'expressiun directa, maletgs d'amicizia sco spievels da la rait privata, artistica ed interculturala. Vitiers vegnan las ovras en ils dossiers, che n'èn strusch vegnidas analisadas ed en las qualas Scherer prenda sco punct da partenza il Raskolnikoff d'in roman da Dostojewski ed il Baal d'in teater da Bertold Brecht. En egl dat qua la tendenza da prender andetgamain «auters scenaris». L'egliada siglia d'in maletg intensiv a l'auter. Uschia daventa l'estetica dal film mit expressiunistic marcanta. Hermann Scherer ha reagì directamain sin tala.

L'exposiziun è vegnida sviluppada en stretga collavuraziun cun il Museum d'art da Basilea. En il Museum d'art dal Grischun è l'exposiziun formulada cumplettamain da nov. Per concepir l'exposiziun a Cuira han ins pudì gudagnar l'artist Vaclav Pozarek.

Cumplettada vegn l'exposiziun «Hermann Scherer. Crennas e chantuns» cun la preschentaziun da la collecziun «Grafica da l'expressiunissem» che vegn medemamain mussada a partir dals 18 da zercladur en il Cabinet dal Museum d'art dal Grischun.

Uras d'averturaMa-Du 10.00 – 17.00 Gi 10.00 – 20.00