Dapi 2005 dovra il Museum d'art dal Grischun la Villa Garbald a Castasegna sco filiala. Las localitads na servan betg sco gallaria, mabain i duain vegnir dads cun art novs impuls en il «lavuratori d'ideas Villa Garbald». Sin visita è quest onn l'artista svizra renumada Cécile Wick. Cécile Wick (*1954) fa part da la generaziun d'artists svizzers che han tschertgà enturn l'onn 1980 ina nova moda da tractar il medium da la fotografia e che han deliberà quel da la colliaziun cun la realitad visibla. Sia elavuraziun experimentala dat als maletgs ina qualitad pittoresca ed in'aura misteriusa. Per la Fondazione Garbald circumdescha ella cun sia camera l'iert enturn la villa da Semper en il ciclus da las stagiuns. Gist uschè impurtants sco l'integraziun al lieu èn ils process figurativs posteriurs che mainan ad ina qualitad speziala dal maletg. Quests novs maletgs da Cécile Wick tematiseschan il process fluent da vita e mort e fan a medem temp ina punt tar las fotografias d'art dad Andrea e Margherita Garbald. Curada vegn l'installaziun d'art en la villa Garbald da Stephan Kunz.
Vernissascha: ils 4 da fanadur 2026, 17:00 Villa Garbald, Castasegna
La fundaziun Garbald maina a Castasegna in «labor da reflexiun» e quai en il senn dal spiert avert da la famiglia Garbald. Per quest intent stattan a disposiziun la villa erigida da Gottfried Semper sco er la nova tur dals architects Miller&Maranta. Entras la collavuraziun cun il Museum han lieu mintg’onn novas preschentaziuns d’art, quai che ha dà novs impuls a quest lieu. Il Museum d’art Grischun sa stenta da mantegnair l’ierta dal fotograf ed artist Andrea Garbald e da tegnair viv en questa chasa l’interess per l’art da fotografar.
www.garbald.ch
