Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2021

​Corsin Fontana
scalafundas
28.08.-21.11.2021

L'artist Corsin Fontana (*1944) mussa sias ovras dapi l'onn 1968 en numerusas exposiziuns individualas e sa participescha er ad exposiziuns en instituziuns naziunalas ed internaziunalas. Fontana è creschì si a Domat, ha vivì blers onns a Basilea e pendulescha tranter Basilea ed il Grischun.

Suenter la retrospectiva da Corsin Fontana l'onn 2009 en il Museum d'art dal Grischun drizza l'exposiziun actuala il focus sin las lavurs dals ultims diesch onns ed integrescha singulas ovras e gruppas d'ovras precedentas che n'èn fin ussa betg vegnidas mussadas. Corsin Fontana ha tschernì dapi il cumenzament la via da la simplificaziun e da la reducziun, ha lavurà cun materials "povers", ha integrà process da la natira en sia ovra ed è sa concentrà adina dapli sin ina lingua da las furmas che va pli lunsch ch'ils maletgs. Las lingias, las griglias, ils rasters èn daventads ils elements purtants dals maletgs che mussan dentant en lur realisaziun materiala en crida dad ieli structuras vivas plain sensualitad.

La finamira e la pretensiun da l'exposiziun èsi da mussar la lavur artistica da Corsin Fontana en sia gronda consequenza, ma er d'eruir il medem mument auters connexs e da communitgar novs puncts da vista. Uschia metta cunzunt l'integraziun da la gronda collecziun da musica nordafricana da Corsin Fontana en l'exposiziun ed en il catalog in focus nunspetgà. Tuttenina daventan categorias impurtantas che na stevan fin ussa betg en il center: glisch e sumbriva, surfatscha e spazi, mussar e cuvrir, visibilitad ed invisibilitad, metter en retscha e variaziun, ritmus e dinamica. E la simplificaziun radicala da la lingua da las furmas na stat betg mo pli en connex cun las lingias da svilup da la pictura occidentala, mabain entra en dialog cun autras furmas d'art e da cultura.

 

Exposiziun Scalafundas da Corsin Fontana - Beitrag RTR_7.9.2021


Uras d'averturaMa-Du 10.00 – 17.00 Gi 10.00 – 20.00