Cun sia ovra interdisciplinara plain fassettas vala Dieter Roth sco in dals gronds artists universals dal 20. tschientaner. Naschì l'onn 1930 a Hannover, ha il figl d'in Svizzer e d'ina Tudestga vivì alternativamain a Basilea ed en l'Islanda, ha picturà, dissegnà, scrit, filmà, collecziunà e creà in dumber d'installaziuns quasi infinit.

Il Museum d'art dal Grischun deditgescha a Dieter Roth in'exposiziun. A maun da gruppas d'ovras represchentativas dat quella ina rara survista da sia stampa grafica excessiva. Sin fundament d'ina da sias emprimas ovras davart l'art e la poesia concreta è l'act da liberaziun artistica reussì a Roth a Providence, USA. L'artist ha experimentà da qua davent cun victualias sco material per sias ovras, ha rut cun tut las aspectativas formalas ed ha uschia inizià in svilup che vala fin oz sco revoluziunar Silsuenter ha l'artist stgaffì in'ovra grafica stampada da diversitad stilistica enorma. Stampats che integreschan liongia e chaschiel, serigrafias iconograficas tenor cartas postalas u tardas ovras da natira morta plitost pittorescas dattan perditga da sia immensa creativitad. En il center è restà il tema autoreflexiun ch'è sa preschentà en tut sias fasas – ina giada plain umor, ina giada en moda autocritica, ina giada en moda laconica. Da sia dispita cun la lingua, a la quala el è restà fidaivel sia entira vita, èn resultadas ovras che n'han betg pers lur valur provocativa, e quai fin en il temp preschent. L'exposiziun d'ovras, che cumpiglia circa 200 graficas, pussibilitescha en il focus da las ovras-clav in'approfundaziun unica da l'opiniun d'ovra experimentala da Roth e vegn accumpagnada da cudeschs d'artists tschernids, cun ils quals el ha medemamain ristgà insatge nov.

L‘exposiziun che dr. Dirk Dobke e dr. Ina Jessen han curatà per las Deichtorhallen Hamburg / Collecziun Falckenberg e ch‘è ina cooperaziun cun la Dieter Roth Foundation vegn adattada per il Museum d‘art dal Grischun. L‘exposiziun da Dieter Roth la pli voluminusa dapi bun 20 onns mussa ovras materialas ed ovras stampadas da tut las periodas d‘activitad.