Andrea Todisco (*1998) gudogna quest onn il Premi d'art da l'Uniun grischuna d'art. Naschì e creschì si a Razén, s'occupa el da la forza narrativa da materialias elementaras. En sia exposiziun individuala en il Museum d'art dal Grischun lascha Andrea Todisco nascher ina gronda installaziun da sal e d'in giatter da metal, che sa basa sin la lavur Anker und Erde (2022), cun la quala el è sa participà a l'exposiziun annuala 2022/23.

En il labor dal tract nov s'auza davant noss egls in grond mantun da sal. Il sal sa derasa sur il palantschieu, evidentamain senza esser impressiunà dal giatter da fier ch'emprova invanamain da'l mussar ils cunfins enturn ed enturn. En l'installaziun Salz und Gatter (2023) metta Andrea Todisco en dumonda cun ina metafra figurativa las forzas da la natira ed ils princips fisicals. A medem temp chapescha el ses operar sco in lieu, nua che narraziuns sa scuntran e sa separan puspè. Il cumenzament dal svilup da questa lavur è stada la visita d'ina salina a la riva da la mar a Trapani en la Sicilia. Cun sia installaziun dischlochescha el simbolicamain il sal da la mar en las muntognas e stgaffescha uschia in cuntrapunct geografic. Tranter quests extrems topologics nua Todisco ina rait da differents plauns significativs. El analisescha la relaziun tranter l'intern e l'extern: il sal sco mineral necessari per viver ed a medem temp sco mineral che impedescha la vita e sia relevanza istorica-culturala sco basa da civilisaziuns.