Famiglia Giacometti

La famiglia d'artists ch'è enconuschenta sin plaun internaziunal e che deriva da la Bregaglia cun Giovanni Giacometti e cun ses figls Alberto e Diego sco er cun Augusto ch'è parentà dalunsch è represchentada en moda prominenta cun vastas gruppas d'ovras en la collecziun dal museum d'art dal Grischun.

La Villa Planta istorica preschenta lavurs elegidas dals commembers da la famiglia Giacometti, uschia ch'ella po vegnir scuverta sco "chasa Giacometti". Ils accents dattan l'uschenumnada "Farbe-im-Licht-Malerei" da Giovanni Giacometti sco er lavurs da ses amis artists Giovanni Segantini, Ferdinand Hodler e Cuno Amiet. Els tuts represchentan cun lur metodas artisticas individualas en l'art svizzer la partenza fulminanta en il 20avel tschientaner. 

Plinavant cumpiglia la collecziun er sculpturas, maletgs e dissegns impurtants dad Alberto Giacometti, il qual ha influenzà en moda duraivla l'art dal temp modern. Las mobiglias creadas cun inschign da Diego Giacometti, il qual è stà durant sia entira vita il maun dretg dad Alberto e ch'è sa profilà pir tard sco artist independent, cumpletteschan la collecziun Giacometti en la Villa Planta.

Las abstracziuns dad Augusto Giacometti ch'èn resultadas surprendentamain baud e che han gidà essenzialmain a renovar la pictura svizra dal 20avel tschientaner, furman il punct da partenza da la segunda part da la preschentaziun da la collecziun en l'edifizi d'engrondiment.