En l'exposiziun en il Museum d'art dal Grischun circulescha l'ovra plastica da Markus Müller (*1970, CH) enturn il potenzial da la renovaziun e sondescha uschia l'impurtanza da passadis e da spazis intermediars. Simbolicamain creescha l'artist da Basilea cun ragischs grischunas ina installaziun che transfurma il local d'exposiziun en in surchombras. Markus Müller construescha in lieu drizzà vers anen, in local intim, en il qual vegnan fatgs plans, imaginads models (da pensar) ed arcunadas regurdientschas.

Il labor sco local d'exposiziun en il plaun sura da l'edifizi nov e sia grondezza specifica dattan l'impuls a Markus Müller d'endrizzar qua in palantschin temporar. Per quest intent construescha l'artist las pendenzas dal tetg tipicas da plauns sut il tetg. Empè da las tavlegiar cun lain, las surtira el però cun juta, in material da fibras natiralas. Sin l'emprima egliada mussa il local las caracteristicas tipicas d'in palantschin. Il local è bass, las pendenzas dal tetg restrenschan la vista, la glisch è brausla u sombra. A medem temp sa revelescha la construcziun sco attrappa e represchenta uschia in aspect central da l'ovra da Müller. En il cudesch d'artist Rauch vegnan questas dumondas davart la sculptura medemamain messas en il focus. Sco spievel da l'exposiziun reflectescha el il medium sculptura en relaziun cun sia istorgia e cun sia impurtanza en nossa societad. Per l'emprima giada dat el uschia in access a las ragischs da sia lavur plastica. En il gieu tranter exposiziun e cudesch daventa il local uschia ina tribuna, sin la quala i vegnan tractadas sco talas la significaziun da la decoraziun en nossa cultura però er las dumondas davart l'essenza dal process creativ.

Tar l'exposiziun cumpara en la edition fink il cudesch d'artist Rauch cun essais da Katharina Dunst, Mohomodou Houssouba, Damian Jurt, Annaïk Lou-Pitteloud, Muda Mathis e Markus Müller.