EDIFIZI NOV DALS ARCHITECTS BAROZZI/VEIGA
L'onn 2011 ha pudì vegnir publitgada ina concurrenza d'architectura internaziunala. Gudagnà quella ha il biro d'architectura Estudio Barozzi/Veiga da Barcelona.
Il nov museum persvada tras sia clera furma e tras sia plazzada precisa en il context cun la Villa Planta e cun l'edifizi d'administraziun da la Viafier retica. La volumetria concisa e cumpacta sur terra suttastritga – er tras la structura simmetrica da la fatschada – l'independenza, ma er la tenuta respectusa envers la preziusa villa en il curtin ed envers l'edifizi vischin. Resultà è in ensemble persvadent da trais edifizis d'auta valur architectonica. El metta in ferm accent urbanistic e stgaffescha ina plivalur per il maletg da la citad da Cuira.
En moda raffinada e cun la medema clerezza han Barozzi Veiga planisà er a l'intern. Resguardond la Villa Planta èn princips concepziunals vegnids interpretads ed applitgads da nov. En il foyer, la localitad centrala al plaunterren, sa mussa la referenza a la villa en moda impressiunanta.
PDF publicaziun da construcziun
VILLA PLANTA
Il center istoric dal museum d'art dal Grischun è la Villa Planta, ina villa palladianica cun accents orientals. Construida a l'ur da la citad veglia da Cuira ed en in lieu central da la nova part da la citad, è ella stada suttamessa durant sia istorgia da 140 onns a pliras midadas d'utilisaziun e da construcziun, fin ch'ella è daventada ina part da l'ensemble dal museum dad oz.
Tras ils vaiders vers vest, che han l'autezza da la localitad, sa mussa la Villa Planta per uschè dir sco maletg, sco ovra d'art, en in rom. En la part dal cubus sur terra sa chattan la stanza da projects, l'intermediaziun d'art e la tecnica dal museum – tuttas stanzas cun glisch dal di. Pir sin ils plauns sutterrans mussa il museum sias vairas dimensiuns. Ils locals d'exposiziun èn survesaivels, pon vegnir duvrads en diversas modas ed han proporziuns agreablas. En in lieu central e cun ina gronda evidenza è ordinada la colliaziun cun la villa. Qua èsi evident: ils dus edifizis tutgan ensemen. Cun grond quità è vegnida renovada e reparada la Villa Planta – l'edifizi ch'è vegnì construì ils onns 1874 fin 1876 da l'architect Johannes Ludwig e ch'è ussa sut protecziun da monuments. Cun gronda chapientscha per la substanza architectonica istorica e cun cumpetenza professiunala han Gredig Walser planisà las midadas da construcziun e las adattaziuns voluminusas en collavuraziun cun la tgira da monuments ed han pudì augmentar considerablamain tant la valur dals locals d'exposiziun sin il plaun sutterran sco er quella dals locals d'administraziun sin il plaun sut il tetg.
Ina da las grondas sfidas – numnadamain las modernisaziuns tecnicas da la protecziun cunter incendis, da la segirezza e dal clima en ils locals – è vegnida schliada en moda persvadenta. En quest reguard na datti naginas differenzas tar il nov edifizi, e tuttina n'è la tecnica cumplexa strusch vesaivla.
La Villa Planta, la «sedia centrala» da la Collecziun grischuna d'art, ha survegnì in engrondiment. In edifizi che na stat – cun sia eleganza e cun ses carisma – betg en concurrenza cun la venerabla villa, mabain ha avert in dialog cun tala. Questa qualitad è da lunga durada ed è ina part da la cultura architectonica dal Grischun.
