Olga Titus (*1977, CH) è la titulara dal quart premi d'art da l'Uniun grischuna d'art. Sut l'aspect da sia biografia svizra, indica e malaisica reflectescha l'artista dumondas davart l'identitad e davart il caracter cultural. Ses maletgs or da pagliettas stampadas, sias installa-ziuns e lavurs da video stgaffeschan in cosmos captivant dad estetica bollywoodiana, folclora, cultura da pop e munds da gieus da computer. En l'exposiziun en il Museum d'art dal Grischun mussa Olga Titus sia pli gronda ovra da pagliettas da fin ussa. Las pagliettas traglischantas stampa ella d'omaduas varts e creescha la cumposiziun dal maletg cun ir cun il maun sur las pagliettas e cun las volver als lieus selecziunads. L'artista descriva il cupitgar da pagliettas sco gest pittoresc e di latiers, che la realisaziun da ses maletgs na saja mai cumplettamain terminada. Tut tenor l'incidenza da la glisch sa mida il gieu da colurs, tut tenor la tutgada sa preschentan las pagliettas da nov. La basa da questas ovras èn collaschas digitalas che sa cumponan da maletgs or da l'internet. La glisch gioga er ina rolla centrala en ina nova gruppa d'ovras. Sin surfatschas da metal satiglias dissegna l'artista ils fastizs da las reflexiuns dal sulegl che vegnan reproducidas durant la lavur sin il fegl da metal. Cun leva pressiun grava ella il gieu da la glisch en il fegl. Questas marcaziuns da la glisch metta Olga Titus en la stanza sco maletgs posiziunads sidretg vesaivels d'omaduas varts. Er en il video Crystallization sa chattan material e glisch datiers in da l'auter. Nus vesain in cristal en furma da caleidoscop che scuntra tocs da cuntrada asiatica, mascras arcaicas, rivas da segunda vita. Ils munds visuals d'Olga Titus alterneschan tranter la potenza figurativa digitala e quella objectiva analoga e pon sensibilisar nossa egliada per la diversitad da furmas d'expressiun culturalas. Tar l'exposiziun cumpara – en la chasa editura Edizioni Periferia – in catalog ritgamain illustrà cun texts da Damian Jurt e da Stephan Kunz.
Filmporträt Olga Titus
