Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2021

Pascal Lampert. Premi d'art da l'Uniun grischuna d'art 2021
12-12-2021 - 30-1-2022

Pascal Lampert (*1972) è il titular dal terz premi d'art da l'Uniun grischuna d'art. La promoziun cumpiglia ina preschentaziun en il rom da l'exposiziun annuala e l'ediziun d'ina publicaziun cumplessiva.

Pascal Lampert è enconuschent per sias lavurs performativas ed ha realisà fin ussa numerus projects en locals d'art, en gallarias ed a festivals da performance. En sias acziuns sa mova el tras il spazi public, nua ch'el lascha enavos filigranas svapurantas sin l'asfalt. Per quai construescha el objects da materials simpels sco butschins, spungias u sugas ed als surdat sco buls surdimensiunads la funcziun d'utensils. Per l'exposiziun en il Museum d'art dal Grischun reunescha el quests objects per l'emprima giada sco objects individuals en la stanza. Els daventan sculpturas moviblas che fan ramurs sco instruments d'in orchester. Lur mund dals tuns sa cumpona d'in sgriflar, d'in sumsum e d'in schuschurar discret che nascha tras moviments mecanics e tras registraziuns sonoras. Intgins fan ins perfin discurrer. L'istorgia performativa dals objects resta adina evidenta. En il local d'exposiziun regorda l'arranschament da las sculpturas in orchester disfuncziunal. Las ovras èn drizzadas vers in podest ch'è vid. La persuna che dirigia manca (anc) ed uschia èsi chaussa da las visitadras e dals visitaders da surpigliar ina nova rolla ed interagir cun ils objects. Ils objects funcziunals daventan subjects scurrils che sunan lur atgna sinfonia en moda suverana. E sco las acziuns da Pascal Lampert è er il tAO (temporäres Aktionsorchester) da natira mumentana, perquai ch'ils objects returnan tar lur funcziun originara suenter l'exposiziun.

In catalog ritgamain illustrà cumpara en connex cun l'exposiziun tar Edizioni Periferia cun in discurs tranter Pascal Lampert e Damian Jurt sco er cun ina contribuziun da Stephan Kunz.

Uras d'averturaMa-Du 10.00 – 17.00 Gi 10.00 – 20.00