L'artista Franziska Furter (* 1972) che viva a Basilea, è vegnida envidada da realisar en il labor dal Museum d'art dal Grischun ina installaziun specifica per il lieu. Il labor en il tract nov dal Museum d'art ha la funcziun d'ina halla d'art che serva sco tribuna d'experiment per artistas ed artists pli giuvens sco er per formats d'exposiziun pli spezials.

La lavur da Franziska Furter pendulescha tranter dissegn e sculptura, tranter paraid e spazi. Sias lavurs bidimensiunalas han savens dimensiuns che s'extendan en il local e lur lavurs tridimensiunalas èn pensadas davent dad ina lingia e cuntegnan la subtilitad e la finezza da dissegns. Quai ch'è pensà sco lingia u sco structura sa cumpona da fitg differents materials, sco sch'ina idea artistica sa manifestass en differents stadis d'agregaziun.