Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2021

Giovanni Giacometti
ils gronds panoramas
05.06. - 29.08.2021

Panorama von Muottas Muragl (Ausschnitt)
Il punct da partenza da l'exposiziun è il panorama da l'Engiadina da Giovanni Giacometti, che cumpiglia quatter parts e che sa chatta da nov puspè sco emprest permanent en il Museum d'art dal Grischun. L'artist è vegnì involvì da Giovanni Segantini en il project dal grond panorama per l'exposiziun mundiala a Paris da l'onn 1900. Suenter che questa idea ha fatg naufragi ha el sez picturà differents panoramas: Suenter il Panorama da Muottas Muragl (1898) ha Giovanni Giacometti picturà ina vista da la cuntrada da l'Engiadin'Ota cun l'imposant hotel Palace da Malögia (1899) e sco finiziun da quests maletgs represchentativs sin incarica ha el stgaffì l'enconuschent Tripticon per l'hotel Waldhaus a Flem (1904). Quests trais maletgs han procurà per in cumenzament fulminant da la carriera da Giovanni Giacometti e mussan, co ch'il pictur ha instradà sia atgna via e co ch'el ha chattà ses stil da malegiar caracteristic.
En l'exposiziun pon ins contemplar per l'emprima giada cuminaivlamain questas ovras ed ins vesa, co ch'in artist d'aut rang sa deditgescha ad in tema spezial ch'è d'impurtanza istoric-culturala e che ha promovì quella giada ideas turisticas.
L'exposiziun ed il catalog che cumpara en quest connex cun contribuziuns da Stephan Kunz, da Paul Müller e da Cordula Seger undreschan d'ina vart la prestaziun artistica da Giovanni Giacometti e dilucideschan da l'autra vart istorgias interessantas davart l'incarica per mintga singul maletg. Ina da questas istorgias maina puspè enavos als patruns da construcziun da la Villa Planta, nua ch'il Museum d'art dal Grischun sa chatta oz; quai dat in senn spezial a l'exposiziun en quest lieu.
Uras d'averturaMa-Du 10.00 – 17.00 Gi 10.00 – 20.00