Zilla Leutenegger (* 1968) è in'artista svizra ch'è enconuschenta sin plaun naziunal ed internaziunal. Sias ovras èn vegnidas mussadas en numerusas exposiziuns individualas e collectivas. Il Museum d'art dal Grischun deditgescha ussa ad ella in'exposiziun cumplessiva d'ovras, che suonda in tema central da sia lavur artistica, numnadamain l'impurtanza da spazis sco arcuns da regurdientschas, sco lieus da desideri, da temas e da siemis, ma er sco averturas per l'imaginaziun. L'exposiziun vegn installada sco grond continuum e permetta a las visitadras ed als visitaders d'explorar sin lur tur ils spazis exteriurs ed ils locals interns, ils saluns spazius ed ina fugia en chombras intimas, dal cler en il stgir e dal stgir en il cler. Ella integrescha lavurs pli veglias e collia quellas cun ovras dal tuttafatg novas che vegnan mussadas qua per l'emprima giada. Installaziuns, projecziuns e maletgs da format grond stgaffeschan cuminaivlamain in mund che cumpara fitg privat e tuttina fitg general, perquai che nus ans identifitgain en el e perquai ch'el ans lascha daventar ina part dad el cun nossas regurdientschas e cun nossas associaziuns.
Per l'exposiziun cumpara ina publicaziun ritgamain illustrada cun texts dad Elisabeth Bronfen, Patrick Frey, Max Küng, Stephan Kunz e Juri Steiner.