Ines Marita Schärer è l'otgavla titulara dal premi d'art da l'Uniun grischuna d'art. La distincziun cumpiglia ina preschentaziun individuala en il Museum d'art dal Grischun en il rom da l'exposiziun annuala 2026. Ines Marita Schärer è vegnida undrada cun il Premi grischun d'art 2026 per sias duas lavurs acusticas en l'exposiziun annuala «à table!» sco er per sia ovra cumplexa e la realisaziun adina fitg precisa da ses concepts. Sia lavur cumprenda poesia, performanza, art dal tun e musica experimentala. Sia pratica è mintgamai caracterisada dal context, averta a differentas furmas da savida, nutrida ed animada da pensaders, da collavuraturas e d’alliadas. Ines Marita Schärer s’interessa spezialmain per la svanaivladad, la resonanza e l’eterogenitad da la lingua discurrida e da ramurs che sa chattan a la sava tranter expressiun, semantica e tun. Ina rolla impurtanta en quest connex giogan l'effect, la preschientscha e la performativitad da vuschs. Per l'exposiziun en il rom dal premi d'art sa fatschenta ella intensivamain cun la Villa Planta ed integrescha sia lavur en la structura ch'exista là, l’explorescha, amplifitgescha e la renda accessibla a la percepziun dal public. Ella creescha in entretschament da sound e spazi che pussibilitescha ina percepziun sensitiva dad art ed architectura. Sia attenziun sa drizza en quest connex a las particularitads sco er a quai ch’è invisibel ed als tuns subtils dal lieu. Las experientschas dal conturn da l'artista chattan lur expressiun en l’exposiziun, las qualas ella metta en connex cun temas actuals e reflectescha dal detagl a l'universal. Ella collia veglias ditgas e mitus cun novas istorgias ed imaginaziuns davart il futur. Cun enchastrar ed entretschar motivs che sa repetan, sa furma in ritmus particular. L'exposiziun vegn curatada da Svenja Clauss.
Biografia Ines Marita Schärer (*1987 a Cuira) viva e lavura a Brüssel. Ella ha fatg in bachelor a la Scola auta dals arts a Berna ed in master al Dutch Art Institute. Pliras giadas è ella vegnida premiada cun stipendis e promoziuns. Ella è preschenta cun exposiziuns e performanzas t.a. en Svizra ed a Brüssel.