Hugo Suter (1943–2013) è vegnì enconuschent enturn l'onn 1970 sco commember da la cuminanza d'atelier Ziegelrain dad Aarau e vala sco represchentant impurtant da l'art experimental en Svizra.
Sia ovra è caracterisada tras analisas cuntinuantas dal vesair. En fotografias, graficas, art d'objects e maletgs da vaider ha el tematisà la volatilitad dal mument e la variabilitad dal vesair. La seria da maletgs che cumpiglia pliras parts e che sa numna "je meer ich see" mussa reflexiuns da l'aua levamain en moviment: Tras la supraposiziun da pliras stresas da colur d'acril resultan differentas situaziuns da glisch. In'ulteriura stresa fina dad Iriodin®, ina vernisch industriala, dat a la seria ina glischur perlanta: La colur sa mida tut tenor l'angul da contemplaziun. Las reflexiuns volatilas ha Suter picturà enturn l'onn 2003 en ses atelier al Lai da Hallwil. Grazia a la donaziun da sia dunna Mariann Suter ha la lavur che sa cumpona da pliras parts chattà la via en la collecziun dal museum d'art dal Grischun.