L'incumbensa e la finamira da la perscrutaziun da la provegnientscha è quella da perscrutar l'istorgia da las ovras e da documentar las relaziuns da proprietad e la midada da maun en ina successiun uschè cumpletta sco pussaivel. Sco instituziun publica chantunala n'è il museum d'art dal Grischun betg mo responsabel, mabain moralmain obligà, d'enconuscher las provegnientschas da las ovras d'art da l'atgna collecziun. Il museum d'art dal Grischun sa stenta da crear transparenza e da chattar novas enconuschientschas scientificas cun dilucidar las provegnientschas.
1. project da la perscrutaziun da las provegnientschas 2019–2020
Da 2019 fin 2020 ha il Museum d'art dal Grischun, cunzunt grazia al sustegn prezius da l'Uffizi federal da cultura, pudì realisar per l'emprima giada ina perscrutaziun da las provegnientschas d'ina tscherna da 73 ovras da la collecziun e da var 168 ovras da la collecziun Werner Coninx ch'è entrada l'onn 2018 sco emprest permanent. Ils resultats da las perscrutaziuns èn publitgads en il rapport final ed en il catalog online da las collecziuns. Ils 27 da mars 2021 è vegnida organisada l'exposiziun «L'odissea da Telemachos. Da prinzis a naziunalsocialists davart il tema da la perscrutaziun da las provegnientschas (durada fin ils 24 da matg 2021). En la preschentaziun èn vegnids integrads intgins resultats dals ultims 2 onns da la perscrutaziun da las provegnientschas al Museum d'art dal Grischun.
RAPPORT FINAL DA LA PERSCRUTAZIUN DA LAS PROVEGNIENTSCHAS 2019–2020
2. project da la perscrutaziun da las provegnientschas 2021–2022
Grazia a l'ulteriur sustegn da l'Uffizi federal da cultura (UFC) ha il Museum d'art dal Grischun pudì cuntinuar cun la perscrutaziun da las provegnientschas durant ils onns 2021 e 2022. Quai pertutga 183 ovras supplementaras ch'èn arrivadas en sia collecziun ed en la collecziun Werner Coninx (cumpra, donaziun u deposit) durant ils onns 1933–1945. La finamira da quest project da perscrutaziun era quella da sclerir en moda uschè cumpletta sco pussaivel las provegnientschas da questas ovras ch'èn vegnidas tschernidas cun quità sin basa da lur impurtanza istorica e da lur impurtanza per il Museum d'art dal Grischun, per il chantun Grischun e per la Svizra. Ils resultats da las perscrutaziuns èn publitgads en il rapport final. En il catalog online da la collecziun vegnan er publitgadas las provegnientschas da las ovras correspundentas.
RAPPORT FINAL DA LA PERSCRUTAZIUN DA LAS PROVEGNIENTSCHAS 2021–2022
3. project da perscrutaziun da las provegnientschas 2023–2024
Il Museum d'art dal Grischun è vegnì sustegnì finanzialmain da l'Uffizi federal da cultura (UFC) per 2 ulteriurs onns. En il focus da questa retschertga da las provegnientschas è stada ina donaziun da 17 ovras dad Angelika Kauffmann, ch'è entrada en la collecziun dal museum l'onn 2022. Ils resultats da quest project èn publitgads en il rapport final. En il catalog online da la collecziun vegnan er publitgadas las provegnientschas da las ovras correspundentas.
RAPPORT FINAL DA LA PERSCRUTAZIUN DA LAS PROVEGNIENTSCHAS 2023–2024
Mandat per la perscrutaziun da la provegnientscha al museum d'art dal Grischun:
Dr. Carolin Lange e Dr. Thomas Schmutz, Lange & Schmutz Provenienzrecherchen GmbH
Cun gentil sustegn da Uffizi federal da cultura (UFC), «SWISSLOS/Promoziun da la cultura, Chantun Grischun», «Boner Stiftung für Kunst und Kultur» ed «Werner Coninx Stiftung».
Infurmaziuns: dr. Nicole Seeberger
