Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Actualitads

​augusto Giacometti. Contemplazione
Lavurs sin palpiri
28-01 - 28-04-2024

Augusto Giacometti (1877–1947) tutga tar las pli impurtantas persunalitads artisticas svizras da l'emprima part dal 20. tschientaner. El è naschì a Stampa en Bregaglia, ha studegià a Turitg ed a Paris ed ha passentà onns impurtants a Firenza, avant ch'el è sa domicilià a Turitg. Da là anora ha el adina puspè fatg viadis cun impuls artistics. La scolaziun a Paris tar Eugène Grasset l'ha manà ad in'occupaziun intensiva cun il jugendstil. Skizzas da plantas e d'animals ha el transponì en lavurs ornamentalas ed en repetiziuns regularas d'elements identics. Ellas èn la basa da ses dissegns da pastel, en ils quals la glisch e la colur èn daventadas ils purtaders d'expressiun centrals. En ses art ha el er transponì l'experientscha da fanestras da vaider transparentas e la luminusitad glischanta da las alas da tgirallas. Uschia è el daventà in piunier da la pictura nunfigurativa.

D'emprim ennà han ils dissegns e las lavurs sin palpiri fatg part da ses meds d'expressiun artistics ils pli impurtants. En tals ha el sviluppà sia lingua figurativa tranter figuraziun ed abstracziun. El ha chattà la via a lineaments libers. La fina crida da pastel e la colur d'aquarel glischanta èn suandadas sia voluntad d'ina concepziun dematerialisada da glisch e da colur.

Per quest motiv sa concentrescha l'exposiziun en il Museum d'art dal Grischun dal tuttafatg sin lavurs sin palpiri e mussa las basas da questa ovra. Ella parta dals ritgs effectivs da la Collecziun grischuna d'art e vegn cumplettada cun emprests prominents. Ina part substanziala da l'exposiziun è la collecziun voluminusa da l'architecta Tilla Theus. Questa collecziun arriva l'onn 2024 sco donaziun tar il Museum d'art dal Grischun.


Augusto Giacometti. Freiheit I Auftrag
27.01.-20.05.2024

Parallelamain a l'exposiziun en il Museum d'art dal Grischun mussa la Chasa d'art d'Argovia in'exposiziun cun lavurs d'Augusto Giacometti.


Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00