Fadri Cadonau (*1996) è vegnì undrà cun il premi d'art da l'Uniun grischuna d'art 2025. En l'exposiziun individuala appartegnenta en il Museum d'art dal Grischun maina l'artist las visitadras ed ils visitaders sin in viadi d'experientscha.

Fadri Cadonau viva e lavura a Glion. Sias lavurs mussan – ultra da lur qualitads formalas – adina er puncts centrals tematics che reflecteschan davart temas da la societad.

L'exposiziun actuala en il labor dal Museum d'art dal Grischun è ina inscenaziun spaziala transibla, che cumenza cun in presentiment sonor e che sbucca en ina installaziun sculpturala. L'experientscha visuala e l'experientscha auditiva entran en in dialog vicendaivel, en il qual la percepziun, la realitad mediala e sia inscenaziun sa maschaidan ina cun l'autra. Uschia reprenda Cadonau discussiuns actualas davart la dumonda, quant enavant che differentas percepziuns caracteriseschan debattas socialas da noss temp: Co naschan nossas ideas da la vardad? Cun tge meds po nossa idea da la vardad schizunt vegnir dirigida?

Sche la vista a l'entrada resta anc bloccada d'ina paraid alva, vegnan ins recepì d'ina culissa sonora che fa mirveglius. In text lascha sfunsar en l'istorgia d'ina val muntagnarda fictiva che ha subì midadas profundas. En l'installaziun en il spazi principal, che fa endament sistems da conducts che vegnan organisads cuminaivlamain per sauar prads da muntogna sitgs, collia Cadonau in exempel istoric cun il preschent. Uschia stgaffescha el ina colliaziun tranter observaziuns localas e svilups globals.

Cun il premi d'art da l'Uniun grischuna d'art vegn undrada l'ovra da Fadri Cadonau – in'ovra engaschada sco er poetica, che sa mussa d'ina vart sco fitg averta, ma ch'è tuttina adina formulada fitg exactamain.