Dapi il cumenzament da sia lavur artistica sondescha Daniela Keiser ( *1963 ) differents formats da preschentaziun en sias ovras. En il focus stat la relaziun tranter maletg, lingua e text. Sias installaziuns da gronda dimensiun integreschan savens l’entir local. Las ovras da Daniela Keiser resultan per il solit en in barat cun artistas ed artists da differentas culturas e d’autras spartas, sco la musica, la litteratura e l’architectura.
Per il Museum d’art dal Grischun creescha ella ina installaziun transibla. Sin grondas fotografias sa referescha ella ad ina furma artistica tradiziunala da l’India. Là vegnan dissegnads musters davant entradas da la chasa per terra. Ils musters mussan segns, ma lur significaziun resta zuppada.
L’entir palantschieu dal local d’exposiziun è dal rest picturà ed envida a reflectar, a discurrer ed a sa barattar. En quest connex gioga la lingua da segns sco tschintgavla lingua naziunala ina rolla centrala. Il labor dal Museum d’art dal Grischun daventa uschia in spazi social, nua che lingua nascha e sa mida cuntinuadamain.