Il Museum d’art dal Grischun preschenta l’emprima exposiziun voluminusa da l’artista da renum internaziunal Susan Hefuna en Svizra. L’exposiziun è resultada en stretg barat cun l’artista e dat ina survista represchentativa da la lavur multifara.
Susan Hefuna è naschida l’onn 1962 ed è creschida si en Egipta, en Germania ed en l’Austria. Oz viva ella en Germania ed en Svizra. Sia pratica artistica cumpiglia dissegn, fotografia, installaziun, video e performance.
Susan Hefuna perscrutescha l’interacziun da lieu, temp e percepziun. Sias ovras reflecteschan la dualitad da spazis publics e privats ed avran novas perspectivas sin percepziuns e realitads subjectivas. Las lavurs da Hefuna raquintan istorgias poeticas da citads, da cuntradas e da dialogs culturals ed envidan las visitadras ed ils visitaders da s’approfundar en ses mund artistic e da percepir colliaziuns ordaifer ils cunfins. In focus spezial da l’exposiziun vegn mess sin il spazi cultural Grischun e sin sias relaziuns cun il mund.