Il Grischun posseda ina cultura architectonica fitg sviluppada ch'el tgira fin al di dad oz. Adina puspè procura la cuntrada specifica per sfidas spezialas, e fin al di dad oz è sa sviluppà in agen discurs architectonic. Quest discurs è vegnì reflectà cuntinuadamain durant ils ultims 150 onns en la fotografia. L'istorgia da la fotografia en il Grischun cumenza cun il turissem. Per l'ina ha il turissem purtà cun sai la fotografia, per l'autra han ins er stuì dumagnar incumbensas da construcziun spezialas pervia da l'avertura stradala e turistica. Questas incumbensas han puspè procurà per motivs attractivs per il fotograf. Sco che l'architectura ha survegnì durant ils ultims 150 onns ina gronda independenza en il chantun, è er la fotografia s'emancipada. Ed entant che las structuras d'abitadi ch'eran creschidas istoricamain èn vegnidas midadas rasantamain durant il 20avel tschientaner, hai gì num da dumagnar quest svilup en l'architectura ed en ils maletgs, e da chattar ina nova lingua per omadus champs.

En l'exposiziun cumplessiva sa tracti da mussar e d'analisar il svilup da l'architectura en il chantun Grischun, uschia sco ch'el vegn intermedià tras la fotografia. Tge incumbensas da construcziun stattan en il center e tge aspect han ellas sin il maletg fotografic? Tge midadas sa laschan observar durant ils ultims 150 onns? Perquai che l'architectura e la fotografia giogan ina rolla centrala en il chantun Grischun dapi il 19avel tschientaner e perquai ch'ellas dattan la tempra al maletg da quest chantun, gida l'exposiziun ad elavurar ina part impurtanta da l'istorgia culturala ed a medem temp ad intermediar anoravers in pau da l'identitad culturala. Il museum d'art dal Grischun ha elavurà l'onn 2010 la plattafurma «Fotoszene Graubünden» ed amplifitgescha ussa quella cun l'exposiziun actuala tant areguard il temp sco er areguard il cuntegn.

Partind da l'exposiziun previsa en il museum d'art dal Grischun davart l'istorgia da la fotografia d'architectura en il Grischun han sviluppà instituziuns da cultura e galarias da Cuira ensemen programs che s'occupan da las relaziuns las pli differentas e multifaras tranter l'art e l'architectura.

Cun il sustegn da Swisslos/promoziun da la cultura dal Grischun; banca chantunala grischuna, fundaziun Boner per art e cultura.

Fotografas e fotografs
August Ahrens, Max van Berchem, Karl Brandt, Adolphe Braun, Johann und Jon Feuerstein, Andrea Garbald, Rudolf Grass, Romedo Guler, Foto Holliger, Foto Homberger, Felix Huonder, F. Junginger-Hefti, Alfred Heinze, Ernst Ludwig Kirchner, Christian Ferdinand & Hans Leonhard Meisser, Albrecht Meydenbauer, Domenic Mischol, Photoglob Wehrli, Arnold Casimir Roessinger-Jeanneret, Emil Meerkämper, Rudolf Anton Reinhardt, Gottlieb Lienhard & Rudolf Ludwig Salzborn, Albert Steiner, Rudolf Zinggeler
Hélène Binet, H. D. Casal, Hans Danuser , Lucia Degonda, Katalin Deér, Ralph Feiner, Heinrich Helfenstein, Christian Kerez, Florio Puenter, Paolo Roselli, Stephan Schenk, Margherita Spiluttini, Jules Spinatsch

Catalog
Tar l'exposiziun cumpara en la chasa editura Scheidegger & Spiess in cudesch da lectura ritgamain illustrà. El porscha ina istorgia da la fotografia d'architectura en il Grischun e mussa mintgamai la vista specifica d'architects, d'inschigners e da fotografs en contribuziuns dad Ulrich Binder, Jürg Conzett, Leza Dosch, Peter Egloff, Hans Frei, Köbi Gantenbein, Luca Geisseler, Marco Guetg, Madlaina Janett, Heinrich Helfenstein, Christoph Kübler, Stephan Kunz, Benedikt Loderer, Gerhard Mack, Raimund Rodewald, Ludmila Seifert, Aline Tannó, Philip Ursprung, Martin Walder e. a. Ultra da quai vegnan discutadas dumondas davart l'applicaziun da la fotografia d'architectura per cartas postalas, per la reclama e per la furmaziun da l'opiniun politica.

Vernissascha: Venderdi, ils 15 da favrer 2013, a las 18.00
I discurran: Stephan Kunz, directur dal museum d'art dal Grischun, e Köbi Gantenbein, schefredactur da la revista Hochparterre
Concert: Curdin Janett e Domenic Janett