Dapi ils onns 1960 ha Margret Rufener dissegnà e scrit. Tuttina n'ha sia ovra betg chattà la via a la publicitad fin ussa. En il museum d'art dal Grischun vegn ella per l'emprima giada preschentada en moda cumplessiva.

Margret Rufener ha considerà il dissegnar sco occupaziun accessorica. Adina eran autras chaussas pli impurtantas. Per la graficra diplomada la concepziun da cudeschs, per la mamma la famiglia, per l'artista il sustegn da ses um Jean-Frédéric Schnyder. Uschia n'ha sia atgna ovra ch'ella ha tuttina adina cuntinuà betg chattà la via a la publicitad fin ussa. En il museum d'art dal Grischun vegn ella per l'emprima giada preschentada en moda cumplessiva.

En il center da l'ovra da Margret Rufener stattan dissegns che sa sviluppan fermamain or dal moviment dal corp, che reflecteschan connexs da la vita e che tschertgan equivalents figurativs per il pensar e sentir da l'uman, per il temp sco er per la passageritad. A medem temp stgaffescha ella grondius texts poetics sco maletgs calligrafics u per cudeschs e carnets or d'atgna ediziun. Per l'exposiziun ha l'artista fatg ina tscherna precisa da sias ovras e resumà quella en diesch locals tematics.
Margret Rufener è naschida l'onn 1938. Oz viva ella a Zug. A Basilea ha ella emprendì graficra, alura ha ella lavurà sco designra da grafica en Svizra ed a l'exteriur. Ella ha surpiglià concepziuns da cudeschs en spezial per il museum d'art da Berna, per il galerist legendaric da Berna Toni Gerber sco er per ses um Jean-Frédéric Schnyder. Oz dissegna ella cunzunt e scriva texts. Quai sa manifestescha en il simpel titel da l'exposiziun "dissegnar scriver".

Davart l'exposiziun cumpara in catalog en dus toms da la chasa editura Scheidegger & Spiess:
Tom 1: Margret Rufener: Da tutta sorts fegliets (cun in text da Stephan Kunz)
Tom 2: Margret Schnyder: Vnà

Vernissascha: Venderdi, ils 13 da settember, a las 18.00
Bainvegni ed introducziun: Stephan Kunz, directur dal museum d'art dal Grischun