Enturn l'onn 1970 tutgava Heiner Kielholz tar l'avantgarda giuvna svizra. Gia prest è el sa retratg da la publicitad animada dal mund da l'art. Sia via l'ha manà silsuenter sin blers viadis cunzunt en l'Europa da l'ost e dal sidost, en Grezia ed en Tirchia. En sias raras exposiziuns dat el invistas da sia ovra artistica che oscillescha adina sin il cunfin tranter il mund exteriur ed il mund interiur. En il museum d'art dal Grischun stattan gruppas d'ovras dals ultims 30 onns en il center; ovras ch'èn naschidas en las Alps dal sid, nua che Heiner Kielhoz viva e lavura dapi in tschert temp.

Bittà enavos en ses proxims conturns ed en in spazi da viver fitg stretg, ha Heiner Kielholz chattà ina gronda concentraziun, ma er ina libertad ed ina independenza che fan surstar. Uschia sa scuntran en l'exposiziun ovras da la Val Vuclina, da la Val Camonica u da la Val Puschlav; maletgs, en ils quals l'artist cumprima experientschas da ses viadis en auters spazis culturals. L'artist tschertga diversas pussaivladads per chattar equivalents malegiads per la realitad visibla. Il sguard en il mund daventa il tema da sia pictura. Ma mintgatant oppona el er models abstracts al mund material. Ils viadis chattan l'ultim temp in resun en ina retratga pli e pli radicala ed en sia restricziun conscienta en la tscherna dals motivs, en natiras mortas ed en interiurs reducids. Heiner Kielholz na sa lascha betg fixar sin insatge. Conscientamain sa metta el ordaifer tutta fixaziun e tutga tuttina adina puspè entamez il cor da l'art e da la vita.

Vernissascha: venderdi, ils 6 da zercladur 2014, a las 18.00
Introducziun: Stephan Kunz, directur dal museum d'art dal Grischun

Catalog
Heiner Kielholz, cun texts da Stephan Kunz e da Gian Casper Bott, Museum d'art dal Grischun Cuira, Turitg: Scheidegger & Spiess, 2014, 80 paginas, 47 illustraziuns