Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2015

Gastspiel
​HR GIGER: happy birthday, mr. giger
iM STADTHAUS CHUR
13.11. – 27.11.2015

L'onn 2015 avess HR Giger pudì festivar ses 75. anniversari. Il museum d'art dal Grischun profita da l'occasiun per deditgar in'exposiziun al figl da renum mundial da la citad a Cuira en la chasa municipala.

Sco in dals represchentants ils pli impurtants da l'uschenumnada figuraziun fantastica ha HR Giger (1940-2014) stgaffi in'ovra sensaziunala e multifara. L'architect d'interiurs e designer d'industria è stà bun d'inscenar en moda artistica tematicas ed anguschas actualas sco returns da quai ch'ins aveva supprimì, ed uschia d'occupar la finala ina posiziun independenta. Suenter ch'il nativ da Cuira ha survegnì l'onn 1980 in Oscar en la categoria «Megliers effects visuals» per l'equipament dal film da science fiction Alien, ha el obtegnì renum mundial.

En la chasa municipala da Cuira preschenta il museum d'art dal Grischun lavurs da HR Giger ord l'atgna collecziun, ord la collecziun da la citad da Cuira sco er tscherts emprests. Il spectrum artistic tanscha da dissegns en tusch fin a las passaschas anguschantas ed a las figuraziuns biomecanicas.

Ultra da quai vegn mussada ina tscherna da cuvertas da plattas fonograficas che Giger ha sviluppà per differentas bands internaziunalas sco Emerson, Lake & Palmer u per la chantadura Debbie Harry da Blondie e ch'èn daventadas en il fratemp classichers da la grafica da rock. La documentaziun Passagen dal reschissur svizzer Fredi M. Murer che datescha da l'onn 1972 e ch'è integrada en l'exposiziun dat ultra da quai invistas persunalas ed infurmativas dal viver e da l'operar da l'artist. Durant la «sonda lunga» porscha il museum d'art in program spezial en l'exposiziun.

Vernissascha: Gievgia, ils 12 da november 2015, 18.00
Bainvegni: Doris Caviezel-Hidber, cussegliera da la citad da Cuira
Introducziun: Stephan Kunz, directur dal museum d'art dal Grischun 

Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00