Gaudenz Signorell è in magier dal maletg fotografic. A partir da ses cumenzament artistic a la fin dals onns 1970 suonda el sias retschertgas visualas manond la fotografia a sias limitas. La realitad fotografica n’è betg in punct fix, sia lavur sa deliberescha da la funcziun da las fotografias ed el s’interessescha oravant tut per il maletg fotografic. Las fotografias vegnan suttamessas ad in process da tractament intensiv e sa fan uschia pli e pli independentas. La fotografia daventa in equivalent da la realitad. Al mund visibel oppona Gaudenz Signorell maletgs interns. El operescha cun la forza da la memoria e megliurescha cun meds figurativs l’expressiun dal maletg. El intervegn en la materia da la fotografia, lavura ed experimentescha sco in alchemist en la stanza naira. A la fin dentant sa deliberescha el da tut concret per s’allontanar dal maletg e per al dar in’aura misteriusa.

L’emprima gronda exposiziun cun ina survista da la lavur artistica da Gaudenz Signorell mussa sia via impressiunanta e sia lavur che sa fatschentada cuntinuadamain cun il maletg fotografic. Dapi passa 40 onns lavura l’artist-fotograf che deriva dal Grischun (naschì 1950) vi dal connex particular tranter il mund extern ed il mund intern e creescha maletgs da gronda forza expressiva. Segiurns artistics pli lungs a Roma, Paris, New York, Cuba ed India caracteriseschan sia lavur sco er la lavur concentrada e solitaria en ses atelier a Domat/Ems.