Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

2019

Ord la profunditad dal temp. Art en il grischun avant 1530
14.04.-15.09.2019​

In'exposiziun da Peter Zumthor, da Stephan Kunz e da Florio Puenter

A chaschun dal giubileum da 100 onns na metta il museum d'art dal Grischun betg sia atgna istorgia en il focus, mabain attribuescha ina profunditad istorica a l'art dal Grischun e celebrescha a medem temp la Villa Planta en sia particularitad architectonica. L'anteriura chasa privata serva dapi l'onn 1919 sco museum.

Ensemen cun l'architect Peter Zumthor ch'è sa participà durant ils onns 1980 en moda decisiva a la renovaziun da la villa, avain nus concepì in'exposiziun che mussa ina schelta d'ovras d'art dal Grischun, ch'èn naschidas avant la refurmaziun. Ins na vesa però betg ils objects istorics, mabain fotografias da Florio Puenter che reflectescha en sia ovra adina puspè aspects istoric-culturals e che nus avain pudì gudagnar sco artist per quest project.
Per l'exposiziun èn vegnidas tschernidas ovras da tut ils secturs da l'art e da la cultura: chats archeologics da la val Calanca sco er sculpturas da marmel da Müstair, reliquiaris dal stgazi da la catedrala da Cuira u frescos da Vuorz, in scrign da l'Engiadina u figuras da Cristus cumplanschì da Domat. Florio Puenter ha surpiglià l'incumbensa da viagiar als lieus e da fotografar ils objects. En l'exposiziun vegnan els reproducids confurm a la scala reala en grondezza originala. Las fotografias en alv e nair accentueschan la qualitad estetica particulara da las ovras tschernidas. En l'inscenaziun spaziala furman ellas in cuntrast cun las paraids en colur da la villa e laschan splendurar er quellas.
Cun ils egls dad oz contemplain e dain nus nova attenziun a l'art da temps passads. Uschia sa manifestescha en emprima lingia la valur artistica dals objects. Ma i sa mussan er las differentas significaziuns da las ovras che dateschan d'avant blers tschientaners e ch'intermedieschan cuntegns e contexts spezials. En questa moda reunescha l'exposiziun differentas ideas artisticas che fan or dal museum ina chasa d'art cumplessiva.


Uras d'averturaMa-Du 10.00 – 17.00 Gi 10.00 – 20.00