L'atelier vala da vegl ennà sco surfatscha da projecziun: sco lieu da retratga, d'in-spiraziun – sco local d'intimitad e d'attribuziun publica a medem temp. Cun ses atelier modest, quasi mitic ha Alberto Giacometti influenzà quest maletg. Oz po l'atelier esser ina fabrica, in local da lavur collectiv, nua che art nascha tras process visibels. Per bleras artistas ed artists contemporans n'è l'atelier betg pli mo in lieu fisic, mabain er in monitur, ina rait digitala. Er l'atelier sez è adina puspè daventà il motiv e la tribuna da la lavur artistica.
L'exposiziun illuminescha differentas imaginaziuns, mitus e realitads da l'atelier, cun cumbinar ovras da la collecziun e lavurs da video, tranter auter da Klodin Erb, Paul McCarthy ed Adrian Paci. Las lavurs da video mussan l'atelier sco lieu da pro-ducziun global, sco local da reflexiun e sco lieu d'imaginaziun – ed a medem temp sco lieu, nua ch'il maletg romantic dal local artistic vegn tractà cun ironia e mess en dumonda. En quest connex cumpara l'atelier er sco spazi da desideri che sa chatta en transfurmaziun: Tge effect han la globalisaziun e la digitalisaziun sin la pro-ducziun da la lavur artistica en l'atelier? Co influenzeschan las imaginaziuns da l'ate-lier fin oz l'identitad da las artistas e dals artists? Tgi lavura oz en l'atelier – e tgi mo siemia pli dad el?

Cun ovras da Matthew Barney, Mirko Baselgia, Flurin Bisig, Klodin Erb, Stefan Gri-tsch, Maude Léonard-Contant, Catrin Lüthi K, Paul McCarthy, Adrian Paci.