Selina Frölicher (*1985) e Micha Bietenhader (*1985) furman ensemen il collectiv frölicher | bietenhader ed èn ils titulars dal premi d'art da l'Uniun grischuna d'art. La promoziun cumpiglia ina preschentaziun en il rom da l'exposiziun annuala e l'ediziun d'ina publicaziun.

L'installaziun da medias CRUSH (2020) da frölicher | bietenhader en il Museum d'art dal Grischun deriva dal material da video da l'ovra Juxtapositions (2014). Onns a la lunga stattan las datotecas digitalas talas e qualas sin in disc dir. Cur che frölicher | bietenhader guardan puspè ils videos, constateschan els che las datas dals maletgs èn sa decumponidas. Sco fragments d'ina regurdientscha èn restads enavos mo maletgs disfatgs. Las nianzas da las colurs, las relaziuns dals pixels u las structuras dals maletgs na sa laschan betg pli renconuscher. Avant ch'ils maletgs sa dissolvan cumplettamain, extiran ils artists las datas restadas e las stampan sin surfatschas da plexiglas, cun las qualas els furman ovras amorfas. En il spazi mettan ils artists las ovras en relaziun ina cun l'autra, las embelleschan supplementarmain cun projecziuns e creeschan uschia in gieu da glisch sensitiv. A l'installaziun attribueschan els in element audiofonic da Duri Collenberg. Ils artists laschan nascher ina installaziun captivanta che procura per sia atgna extensiun en il spazi.

Selina Frölicher e Micha Bietenhader illustreschan l'instabilitad da la tecnologia e mettan il focus sin sias ruttadiras, largias ed irregularitads. La magia electronica da lur installaziun ans mussa l'atgna vita da las maschinas che na vegnan mai a sa laschar controllar dal tuttafatg.

Tar l'exposiziun cumpara – en la chasa editura Edizioni Periferia – in catalog ritgamain illustrà cun contribuziuns da Damian Jurt, da Stephan Kunz e da Sarah Mühlebach.