La cuntrada linguistica e culturala dal Grischun serva sco punct da partenza da l’exposiziun «Co che la lingua inventa il mund». Il Museum d’art dal Grischun tracta uschia in tema principal da la cultura umana e localisescha questa expressiun regiunala en connexs globals. Cun focussar sin ina schelta d’ovras d’artistas ed artists naziunals ed internaziunals sco er d’artefacts istorics dal Grischun vegn illuminada l’impurtanza da la lingua e dal raquint en la cuminanza ed en la societad.
L’exposiziun parta da documents linguistics dal Grischun, sco il diari da viadi da Gion Casper Collenberg da Lumbrein dal 18avel tschientaner. Bain exista per la mar en rumantsch tschientaner il pled «la mar», dentant mancan expressiuns per fluss e per refluss. Sco decleraziun recurra Collenberg en ses diari la finala ad in eveniment da la natira ch’è bain enconuschent en las muntognas grischunas. El descriva in aual, dal qual il livel s’augmenta, sch’i plova, e sa sbassa suenter puspè. «Uschia èsi en connex cun la mar.», scriva el. L’exposiziun «Co che la lingua inventa il mund» illuminescha la forza da la lingua da stgaffir imaginaziuns, da crear raquints fictivs ed uschia da diriger nossa vista dal mund. En las ovras d’artistas ed artists sco Not Vital, Erica Pedretti, Thomas Hirschhorn, Marcel Broodthaers, Ian Hamilton Finlay u Susan Hiller sa collian temas sco identitad culturala, narrativs politics, migraziun u midada linguistica. Il tema universal vegn guardà entaifer diversas midadas epocalas e mussa, co che la lingua influenzescha la moda e maniera da noss pensar, agir e chapir il mund.
L'exposiziun mussa ovras da Carl Andre, Arman, Hans Arp, Irma Blank, Marcel Broodthaers, Alois Carigiet, Christo, Gion Casper Collenberg, Marcel Duchamp, John Furnival, Gilbert & George, Eugen Gomringer, Ian Hamilton Finlay/David Ballantyne, Susan Hiller, Karla Hiraldo Voleau, Thomas Hirschhorn/Marcus Steinweg, Jenny Holzer, Rebecca Horn, Vicente Huidobro, Bethan Huws, Marcel Janco, Pascal Lampert, Maude Léonard-Contant, Annette Kelm, Jan Kiefer, Barbara Kruger, Bruce Nauman, Seiichi Niikuni/Pierre Garnier, Meret Oppenheim, Hans Op de Beeck, Erica Pedretti, Augustas Serapinas, VALIE EXPORT, Francis Picabia, Julien Prévieux, Dieter Roth, Kurt Schwitters, Zineb Sedira, André Thomkins, Nora Turato, Tristan Tzara, Jacques de la Villeglé, Not Vital, Kemang Wa Lehulere, Ruth Wolf-Rehfeldt/Robert Wolf-Rehfeldt
