Bianca Barandun (*1984) è la titulara dal premi d'art da l'Uniun grischuna d'art 2024. La dunna ch'è creschida si a Rodels pendulescha oz tranter Essen ed il Grischun. En l'installaziun «Ghost Note» che emplaina il spazi en il labor dal Museum d'art dal Grischun s'occupa ella da la regurdientscha e da la lingua.

Entant che las regurdientschas d'autras persunas han servì sco material da partenza per l'ovra «Silos» en l'exposiziun annuala 2023, ha l'artista ussa tratg a niz ses agen fundus per «Ghost Note»: Las observaziuns dals utschels en il curtin da la chasa da ses geniturs a Rodels. Da quai è resultada ina collecziun da differents materials, cun ils quals Barandun ha laschà nascher ina nova seria da sculpturas da lain.
Ina «ghost note» inditgescha en la musica in curt tun che serva per iniziar il proxim tun e ch'è uschia decisiv per la dinamica da l'entir toc. El è preparaziun: il medem mument è el qua ed er betg qua. La midada tranter la preschientscha e l'absenza interessa Bianca Barandun. Perquai s'interessa ella per regurdientschas. Sco in toc musica èn raquints marcads da concentraziuns e d'acceleraziuns – tut tenor, quant preschenta che la regurdientscha è anc.
En moda poetica transpona Barandun quest concept en il spazi. Sch'ins sa mova tranter las sculpturas da lain, sentan ins in ritmus: En distanzas che varieschan èn installads roms lunghents da lain per lung dal palantschieu. Quests spazis intermediars èn quels che dattan il tact dal spazi. Adina puspè cumparan spazis vids en l'installaziun sco protagonists: sco distanza tranter ils objects, sco spazi negativ entaifer ils roms, sco spazi vid, sco rudè sin la surfatscha da la paraid. Els èn l'element che furma il spazi tranter la regurdientscha e l'emblidanza, tranter la preschientscha e l'absenza.