L'exposiziun da Diego Giacometti (1902–1985) è concepida sco gronda retrospectiva cumplessiva. Ella è deditgada ad in artist ch'è sa muventà en moda excellenta tranter lavurs applitgadas e l'art liber.
Entant che Diego Giacometti è fin ussa adina vegnì preschentà en la relaziun cun ses renumà frar Alberto («Diego sorta da la sumbriva»; «L'auter Giacometti»), vul l'exposiziun undrar la lavur da quest artist sco ovra independenta. Igl è enconuschent che l'istorgia da success da Diego Giacometti cumenza pir suenter la mort d'Alberto. L'exposiziun mussa che ses operar artistic ha cumenzà bler pli baud. Per l'emprima giada pon vegnir mussadas ovras da l'artist, ch'eran per gronda part nunenconuschentas fin ussa e ch'èn stadas la basa per l'ovra posteriura.
L'exposiziun s'extenda sur tuttas duas chasas dal Museum d'art dal Grischun Cuira. Sia concepziun tegna quint dals differents puncts da vista da questa ovra: En la Villa Planta, in'anteriura chasa privata, cumparan ils objects en furma da mobigliar en il context da la Collecziun grischuna d'art cun ovras dal bab Giovanni Giacometti e dal frar Alberto Giacometti; en il tract nov percunter è il focus sin il process da las ovras ed i vegnan mussads numerus models. Ultra da quai dat l'exposiziun ina vasta invista da las furmas e dal stgazi da motiv da Diego Giacometti, il qual furma la basa da sia creaziun artistica.

L’exposiziun é vegnida sviluppada en stretga collavuraziun cun il „Musée des arts décoratifs“ da Paris. Per concepir l'exposiziun han ins pudì engaschar l'artist Vaclav Pozarek (*1940) ch'è sa mussà gia pliras giadas cun furmas da preschentaziun innovativas e specificas.