Cun l'exposiziun «Haussmann Studiolo» è l'architecta e designra Trix Haussmann returnada a Cuira, nua ch'ella è naschida l'onn 1933 e nua ch'ella ha passentà sia uffanza e sia giuventetgna. Ella e ses um, Robert Haussmann, tutgan tar ils creaders svizzers ils pli impurtants dal 20avel tschientaner. Enconuschents èn lur models da mobiglias e numerusas midadas da construcziun impurtantas en Svizra ed a l'exteriur. Sias ovras architectonicas e teoreticas plain fantasia han chattà durant ils ultims onns nova attenziun ed èn vegnidas undradas en differents lieus. Or d'ina reflexiun critica da la moderna han els sviluppà in'atgna lingua figurativa ed èn sa fatgs valair cun in'atgna tenuta entaifer discurs contemporans. L'exposiziun en il Museum d'art dal Grischun vul avischinar en ina furma concentrada d'in «studiolo» a las basas planisatoricas e conceptualas da la lavur da Trix e Robert Haussmann e mussar en quest connex per l'emprima giada er, co che l'art figurativ ha caracterisà lur ovras.